Xitoyning Uxan shahri hukumati hududda yashovchi aholidan koronavirusga test olmoqchi, deya xabar berdi Reuters.
Mazkur qarorga shaharda koronavirus tarqalishi bilan bog‘liq bir qator lokal holatlar kuzatilgani sabab bo‘lgan, bu bir yil ichida ilk bor sodir bo‘layotgan holatlar, deya qayd etgan Associated Press.
Global Times nashri xabariga ko‘ra, shaharda virus yuqtirib olish bilan bog‘liq yettita lokal holat kuzatilgan; kasallanish shaharda ishlovchi mehnat muhojirlarida qayd etilgan, deb yozmoqda AFP.
COVID-19 infeksiyasini yuqtirib olish bilan bog‘liq yangi holatlar sabab Uxanda maktablar yopilgan va metroga tushayotgan yo‘lovchilarni tekshirish ishlari kuchaytirilgan. Shaharda kasallangan muhojirlar yashagan hududdagi bir nechta bekat yopilgan. Hududning o‘zida karantin joriy qilingan.
Uxan 2019-yil oxirida koronavirus epidemiyasi boshlangan shahar hisoblanadi, COVID-19 asta-sekin boshqa hududlar, keyinchalik butun dunyoga tarqalgan. 2020-yil yozida 11 milliondan ziyod aholi yashaydigan Uxandagi hammadan koronavirusga test olingan.
Garchi koronavirus pandemiyasi ilk bor Xitoyda boshlangan bo‘lsa ham mamlakat keskin cheklovlar va faol emlash ishlari tufayli vaziyatni tez o‘nglashga muvaffaq bo‘ldi. Bugungi kungacha Xitoyda 150 mingta kasallanish holati qayd etilgan. Taqqoslash uchun, AQShda 35 million aholida COVID-19 infeksiyasi yuqtirib olish holatlari kuzatilgan, mamlakat bu borada butun dunyoda yetakchi bo‘lib turibdi.
Iyul boshida butun dunyoda delta shtamm tarqalayotgani oqibatida Xitoyda ham COVID-19 bilan kasallangan bemorlar ko‘paya boshladi. Koronavirus yuqtirib olish holatlari tufayli Xitoyning bir nechta shaharlarida aeroportlar yopildi, poyezdlar harakati cheklandi va karantin joriy etildi. Nankin shahrida deyarli barcha aholi, ya’ni 8,7 million kishidan koronavirusga test olindi.
Izoh (0)