Tojikiston prezidenti Emomali Rahmonning singlisi — 64 yoshli Qurbonbi Rahmonova 20-iyul kuni hayotdan ko‘z yumdi. Bu haqda davlat rahbarining matbuot xizmati xabar bermoqda.

Foto: “RIA Novosti”

Asia-Plus Tojikiston Sog‘liqni saqlash vazirligidagi manbalariga tayanib yozishicha, Qurbonbi Rahmonova koronavirusga chalingan va Dushanbedagi 5-kasalxonada davolanayotgan edi.

Dafn marosimi 21-iyul kuni Dang‘ara shaharchasida bo‘lib o‘tadi.

Tojikiston hukumati Emomali Rahmonga, uning qarindosh va yaqinlariga Qurbonbi Rahmonovaning vafoti munosabati bilan hamdardlik bildirdi.

Qurbonbi Rahmonova “O‘rmon xo‘jaligi va ovchilik” DUK rahbari Xolmo‘min Safarovning rafiqasi bo‘lgan, uning o‘zi esa 2012-yil iyunida o‘ldirilgan edi.

Nashr eslatishicha, Tojikiston prezidentining onasi — 88 yoshli O‘zbekbi Asadullayeva 5-iyul kuni koronavirusdan vafot etgan edi.

Tojikistonda 2021-yilning 11-yanvaridan buyon koronavirusga chalinish bo‘yicha biror-bir rasmiy holat qayd etilmagan. 26-yanvar kuni prezident Emomali Rahmon mamlakat koronavirus ustidan g‘alaba qozonganini e’lon qilgan, shu bilan birga, aholini niqob rejimiga rioya qilish va masofa saqlashni unutmaslikka chaqirgan.

Iyun oyi boshida OAVda Tojikistonda koronavirus qaytadan avj olgani haqida xabarlar tarqaldi. Sog‘liqni saqlash vazirligi esa buni qat’iyan rad etdi va xabarlarni faqatgina mish-mish deb atadi.

Keyinroq Tojikistonda koronavirusga chalinish holatlari haqida rasman ma’lum qilindi. Shu munosabat bilan, mamlakatning har bir fuqarosidan ushbu sohadagi mutaxassislarning tavsiyalariga qat’iy amal qilish, zarurat bo‘lmagan joyga bormaslik, jamoat joylarida niqobdan va boshqa dezinfeksiyalovchi vositalardan foydalanish talab etiladi.

Iyul oyi boshida Tojikistonda voyaga yetgan aholi uchun COVID-19’ga qarshi emlanish majburiy etib belgilandi.