Buyuk Britaniya bosh vaziri Boris Jonson Londonda Belarus muxolifati yetakchisi Svetlana Tixanovskaya bilan uchrashdi. Bu haqda Tixanovskayaning Telegram kanalida xabar berilgan.
“Boris Jonson bilan uchrashuv Buyuk Britaniya hukumati rahbarining bosh ofisida o‘tdi va taxminan, 25 daqiqa davom etdi”, — deyiladi xabarda.
Qayd etilishicha, uchrashuv davomida Tixanovskaya hamda Jonson Belarusdagi fuqarolik jamiyati, siyosiy mahbuslar va ularning oilalariga, talabalarga, tibbiyot xodimlari, ishchilar va boshqa aholi qatlamlariga yordam berish dasturini muhokama qilgan. Bundan tashqari Belarus hukumatiga qarshi sanksiyalar borasida ham fikr almashilgan.
“Sanksiyalar, chora-tadbirlar samarador bo‘lishi, Yevropa Ittifoqi, AQSh hamda Kanada bilan muvofiqlashtirilishi juda muhim”, — deyilgan xabarda.
Shuningdek, Tixanovskaya Buyuk Britaniya bosh vaziriga Belarusdagi so‘z erkinligiga qilinayotgan hujumlar va belaruslarga yordam ko‘rsatish zarurligi haqida gapirib bergan. Suhbat davomida Tokio—2020 Olimpiadasida ishtirok etayotgan yengil atletikachi Kristina Timanovskaya bilan bog‘liq vaziyat hamda Ukrainada halok bo‘lgan belaruslik jamoatchilik faoli Vitaliy Shishovning taqdiri ham muhokama qilingan.
Bundan tashqari, Telegram-kanaldagi xabarda Tixanovskaya va Jonson Buyuk Britaniyadagi Belarus diasporasini qo‘llab-quvvatlash, shuningdek, Yevropada xavfsizlik va hamkorlik tashkiloti, Birlashgan Millatlar Tashkilotining xavfsizlik kengashi, BMTning inson huquqlari bo‘yicha kengashida Belarus bilan bog‘liq muammolarni muhokama qilish imkoniyatlarini ham muhokama qilgan.
Tixanovskaya Buyuk Britaniya bosh vaziriga xalqaro forumlarda Belarusdagi hukumat jinoyatlarini aniqlash va xalqni qo‘llab-quvvatlash tashabbuslari uchun minnatdorlik bildirgan.
Avval Tixanovskayaning AQSh prezidenti Jo Bayden bilan uchrashgani haqida xabar berilgandi. Tixanovskaya Vashingtonda AQSh davlat kotibi Entoni Blinken, kotib o‘rinbosari Viktoriya Nuland, AQSh prezidentining milliy xavfsizlik masalalari bo‘yicha maslahatchisi Jeyk Sallivan hamda mamlakatda istiqomat qilayotgan Belarus diasporasi vakillari bilan ham uchrashgan.
Izoh (0)