Isroilda anomal issiq iqlim tufayli Quddus yaqinidagi Shoresh hududida yong‘inlar kuzatildi. Bu haqda The Jerusalem Post xabar tarqatgan.
Yong‘inlar, taxminan, 10 gektar maydondagi o‘rmonlar hududini qoplab olgan. Ularni bartaraf qilish uchun 8 ta yong‘in o‘chirish samolyoti, vertolyot hamda 24 ta o‘t o‘chiruvchi va qutqaruvchilar guruhi yuborilgan.
Ayni vaqtda guruhlar olovning yaqin atrofdagi yonilg‘i quyish shoxobchasiga o‘tib ketmasligi yuzasidan choralar ko‘rmoqda va aholini xavfsiz hududga evakuatsiya qilgan.
O‘rmon yong‘inlari tufayli Quddus va Tel-Avivni o‘zaro bog‘lab turuvchi avtomobil yo‘li vaqtincha yopib qo‘yilgan.
Isroilda ikki hafta davomida havo haroratining, taxminan, 34—35 daraja issiq bo‘lishi taxmin qilingan.
Avvalroq Kipr, Xorvatiya va Gretsiyada kuchli o‘rmon yong‘inlari sodir bo‘lgan. Shuningdek, Turkiyada ham bir haftadan buyon o‘rmon yong‘inlarini bartaraf qilish bo‘yicha ishlar davom ettirilmoqda. Turkiya prezidenti Rajab Toyyib Erdo‘g‘on Antaliyani falokat hududi deb e’lon qilgan, keyinchalik o‘rmonlarga o‘t qo‘yishda gumonlanib bir kishining qo‘lga olingani ma’lum bo‘ldi. “Olov bolalari” terrorchilik tashkiloti Turkiyadagi o‘rmon yong‘inlari uchun javobgarlikni o‘z zimmasiga olgan.
Izoh (0)