Shavkat Mirziyoyev Tokio—2020 Olimpiadasi sovrindorlari Ulug‘bek Rashidov, Davlat Bobonov va Akbar Jo‘rayevni tabrikladi

O‘zbekiston Prezidenti Shavkat Mirziyoyev 3-avgust kuni bo‘lib o‘tgan videoselektor chog‘ida Tokio—2020 Olimpiadasi sovrindorlarini tabrikladi.

“Davlat rahbari barcha hamyurtlarimizni va jamoamizga ikkinchi oltin medalni keltirgan og‘ir atletikachi Akbar Jo‘rayevni, shuningdek, avvalroq Olimpiya chempioniga aylangan taekvondochi Ulug‘bek Rashidov va bronza medali sohibi Davlat Bobonovni tabrikladi”, — deya ma’lum qildi Prezident matbuot kotibi Sherzod Asadov.

Akbar Jo‘rayev (-105 kg) 3-avgust kuni og‘ir atletika bo‘yicha o‘tkazilgan musobaqada Olimpiya rekordini qayd etib, oltin medalga sazovor bo‘ldi. 28-iyul kuni Davlat Bobonov dzyudo bo‘yicha bronza medaliga ega chiqqan, 25-iyulda esa Ulug‘bek Rashidov taekvondo bo‘yicha oltin medalni qo‘lga kiritdi.

Eslatib o‘tamiz, Prezident farmoniga ko‘ra, Tokio—2020 Olimpiadasida oltin medalga ega chiqqan sportchilar 200 ming dollar, kumush medal egalari 100 ming, bronza olgan sportchilar esa 50 ming dollar miqdorda bir martalik pul mukofoti bilan rag‘batlantiriladi