Dzyudo bo‘yicha -90 kg vazn toifasida O‘zbekiston sharafini himoya qilayotgan Davlat Bobonov Tokio—2020 Olimpiadasi bronza medali uchun kechgan bahslarda ishtirok etdi.

Foto: “Daryo” / Getty Images

O‘tish bahsida Bobonov ispaniyalik Nikolos Sherazadishvilini vazari bahosi bilan mag‘lub etdi. Bronza uchun kechgan bahsda esa turkiyalik Mihael Zgankni ippon bahosi bilan yengib, bronza medaliga ega chiqdi.

24 yoshli Bobonov 1/16 finalda italiyalik Nikolas Mungayni taslim etgan, 1/8 finalda ukrainalik Nyabali Kejauni yenggan bo‘lsa, chorak finalda gruziyalik Lasha Bekauriga yutqazib qo‘ygandi.

Shu tariqa Bobonov O‘zbekiston delegatsiyasiga ikkinchi medalni taqdim etdi. Avvalroq taekvondochi Ulug‘bek Rashidov oltin medalga ega chiqqandi.

Davlat Bobonov 1997-yilning 7-iyunida Navoiy viloyatida dunyoga kelgan. U dzyudo bo‘yicha 2021-yilgi Osiyo chempionati g‘olibi va JCh—2021 kumush medali sohibi hisoblanadi. Davlat Budapeshtda o‘tgan Jahon chempionati finalida Nikolos Sherazadishviga yutqazib qo‘ygandi.