Tokio—2020 Olimpiadasida -109 kg vazn toifasi vakillari o‘rtasida musobaqalar 3-avgust kuni bo‘lib o‘tdi.
O‘zbekistonlik sportchi Akbar Jo‘rayev dast ko‘tarishda 193 kg vaznni bo‘ysundirdi. Bu bosqichda Armaniston vakili Simon Martirosyan 195 kg toshni ko‘tarib, rekord o‘rnatdi. Jo‘rayev esa ikkinchi o‘rinni oldi.
Siltab ko‘tarishda 237 kilogrammni ko‘targan Akbar umumiy 430 kg vaznni bo‘ysundirdi. Bu bilan 21 yoshli Jo‘rayev birinchi natijani qayd etib, oltin medalga sazovor bo‘ldi. Shuningdek, Jo‘rayev siltab ko‘tarish va ikki kurashda Olimpiya rekordini o‘rnatdi. Martirosyan esa dastlabki urinishda 228 kg vaznni ko‘tardi, qolgan ikki urinishda 238 kilogrammni ko‘tara olmadi.
Shu tariqa O‘zbekiston delegatsiyasining medallari soni uchtaga yetdi. Avvalroq taekvondochi Ulug‘bek Rashidov oltin medalga ega chiqqan, dzyudochi Davlat Bobonov esa bronzani qo‘lga kiritgandi.
Ma’lumot uchun, Akbar Jo‘rayev 1999-yilning 8-oktabrda Toshkent viloyatining Bo‘stonliq tumanida tug‘ilgan. Faoliyati mobaynida o‘smirlar o‘rtasidagi Jahon chempionatida (2019) g‘olib bo‘lgan. 2019 va 2020-yilgi Osiyo chempionatida kumush medaliga sazovor bo‘lgan.
Izoh (0)