Австралияда карантинга риоя қилинишини ҳарбийлар назорат қилади, Италияда коронавируснинг тўртинчи тўлқини бошланди. Коронахабарлар

Жонс Ҳопкинс университети маълумотларига кўра, дунёда COVID-19 билан касалланганлар сони 196 631 596 кишини ташкил қилмоқда. 4 199 002 киши вирус оқибатида вафот этган.

Касалланиш ҳолатларининг кўплиги бўйича АҚШ (34,7 миллион), Ҳиндистон (31,5 миллион), Бразилия (19,8 миллион), Франция (6,14 миллион) ва Россия (6,13 миллион) энг олдинда бормоқда.

Австралиянинг Сидней шаҳрида COVID-19’га чалиниш бўйича суткалик рекордлар фонида карантин режимига риоя қилиниши устидан ҳарбийлар ҳам назорат олиб боради.

Янги Жанубий Уэльс штати полицияси маълумотларига кўра, 30 июль, жума куни шаҳарга қарийб 300 нафар ҳарбий жойлаштирилади. Австралия мудофаа вазири Питер Даттон айтишича, ҳарбийлар келаси ҳафтадан карантин қоидаларига амал қилинишини назорат этишда полицияга кўмаклашишни бошлайди.

Изоляция режими бир ойга узайтирилган Сиднейда 29 июль куни бир кеча-кундузда 239 кишида коронавирус аниқланди, бу пандемия бошидан буён рекорд кўрсаткичдир.

Вазият ёмонлашиши туфайли Янги Жанубий Уэльс штати бош вазири Гледис Бережиклян Сиднейда чекловлар кучайтирилишини эълон қилди, у ерда карантин чоралари шундоқ ҳам бир ойдан буён амал қилиб келмоқда. Сиднейнинг жануби-ғарбий ва ғарбий туманлари аҳолиси энди кўчаларда ниқоб тақиши керак бўлади, шунингдек, уйдан 5 километрдан кўпроққа узоқлашишга рухсат берилмайди.

Сидней ҳукумати 28 июль куни шаҳардаги карантин 28 августга қадар узайтирилишини эълон қилди. Дастлаб бу режим 31 июлда якунланиши режалаштирилган эди.

Ишсиз ҳолда изоляция режимида қолиб кетган Сидней аҳолисига моддий компенсация тақдим этилади.

Фонд маълумотларига кўра, 21—27 июль кунлари Италияда коронавирус оқибатидаги ўлимлар сони яна ўсган. Бунгача кетма-кет 15 ҳафта давомида ушбу кўрсаткич мамлакатда пасайиб келган эди. Бундан ташқари, ўтган ҳафта вирус юқтириш ҳолатлари 64 фоизга ўсган (31 963 та ҳолат, таққослаш учун бир ҳафта аввал 19 390 та бўлган). Бундан ташқари, Италия касалхоналарида интенсив терапия бўлимларида ётган беморлар 14,5 фоизга кўпайган.

28 июль ҳолатига, Италия аҳолисининг 63,6 фоизи коронавирусга қарши вакцинанинг камида битта дозасини олган, 52,3 фоизи эса тўлиқ эмланган.

«Катта ёшли одамларда COVID-19’ни бошдан кечиргандан кейин IgG синфидаги антитаналар миқдори анча юқори бўлиб чиқмоқда: 60-70 ёш гуруҳида антитаналарнинг ўртача миқдори 20-30 ёш гуруҳидагидан икки марта кўпроқ бўлди, бу касалланиш даражасининг оғирлигига боғлиқ эмас», — дейилади «Хеликс» компанияси пресс-релизида.

Компания тиббий директори Дмитрий Денисовнинг аниқлик киритишича, ёши катталарда антитаналар миқдорининг катта бўлишини уларнинг иммун тизими бутун ҳаёти давомида ёшларникига қараганда кўпроқ антигенлар билан тўқнашгани ва иммунизацияга яхшироқ реакция кўрсатиши билан боғлаш мумкин.

Шунингдек, тадқиқотларда коронавирусни оғир шаклда ўтказган беморларда антитаналар кўпроқ ишлаб чиқарилиши ҳамда IgG антитаналари аёллар ва эркакларда касалликдан кейин турли муддатларда шаклланиб, сақланиб қолиши маълум бўлди.

• Шунингдек, Саудия Арабистони ҳукумати 1 августдан бошлаб коронавирусга қарши тўлиқ эмланган кишиларнинг мамлакатга сайёҳлик визалари билан киришига рухсат беради. Фақат мамлакатда маъқулланган вакциналар ҳисобга олинади, шунингдек, Саудия Арабистонига киришдан аввал 72 соат ичида ПЗР-тест топшириш керак бўлади.
• Бангкок касалхоналарида коронавируснинг дельта штаммига чалинган беморлар оқими туфайли жойлар қолмади. Пойтахт касалхоналарида кунига минг нафаргача беморлар қабул қилиниши мумкин, аммо 29 июль кунининг ўзида фақат Бангкокда тўрт минг кишида касаллик аниқланган. Шаҳардаги карантин марказлари тўлиб кетган, пойтахт ҳукумати қўшимча ўринлар яратиш мақсадида хусусий клиникалар билан иш олиб бормоқда. 29 июль куни Таиландда касалланиш ҳолатлари бўйича янги рекорд қайд этилди — 17 669 кишида касаллик аниқланди, 165 киши вафот этди.