Арманистон Мудофаа вазирлиги Озарбайжон Қуролли Кучлари 29 июлга ўтар кечаси ўт очишни тўхтатиш режимини бузиб, Арманистон кучлари позицияларини ўққа тута бошлаганини маълум қилди. Арманистон ҳарбийлари уларга жавобан ўт очган, деб ёзади «РБК».
«29 июль, тунги соат учларда Арманистон—Озарбайжон чегарасининг Карвачар йўналишидаги Гегаркуник қисмида Озарбайжон Қуролли Кучлари бўлинмалари бир кун олдин эришилган сулҳ битимини бузганча, яна арман позицияларига ўқ уза бошлади», — дейилади хабарда.
Озарбайжон ўз навбатида, қарши айбловларни илгари сурмоқда ва Арманистонни сулҳ шартларини «қўпол равишда бузганликда» айбламоқда.
«29 июль куни соат 02:45 дан 03:40 гача Арманистон Қуролли Кучларининг Басаркечар тумани Юхар Шўржа қишлоғи йўналишидаги позициялари Озарбайжон армиясининг Келбажар тумани Зейлик қишлоғидаги позицияларини автомат ва гранатамётлардан ўққа тутди. Бизнинг позицияларимиз томонга 10—12 та Ф-1 қўл гранаталари ҳам ташланди», — дейилади Озарбайжон Мудофаа вазирлиги хабарида.
Арманистон ва Озарбайжон чегарасидаги зиддият 28 июлда янгидан авж олди. Ереван Озарбайжон кучлари тўлақонли жанговар ҳаракатлар бошлагани ҳақида, Боку эса Арманистон томонидан ўқ узилгани ҳақида хабар берди. Ереван хабарига кўра, отишмада уч киши ҳалок бўлган, тўрт киши яраланган. Боку икки ярадор ҳақида маълум қилди.
Ўша куни эрталаб икки давлат ўртасида сулҳ эълон қилинганди, келишувга Россия тинчликпарварлари воситачилиги билан эришилган. Арманистон—Озарбайжон чегарасидаги вазият Россия президенти Владимир Путин раислигида Россия Хавфсизлик Кенгашининг тезкор йиғилишида бош мавзу бўлди, дея хабар қилди президент матбуот котиби Дмитрий Песков.
2020 йил кузида Тоғли Қорабоғ атрофида кузатилган Арманистон ҳамда Озарбайжон ҳарбийларининг қуролли тўқнашувларидан кейин Тоғли Қорабоғга қарши еттита туман Боку ихтиёрига ўтган Сюникск ва Гегаркун вилоятлари арманларнинг озарбайжонлар билан чегара ҳудуди деб ҳисоблана бошланган. Вазият 2021 йил 12 майда яна кескинлашган. Шундан буён икки томон янги қуролли тўқнашувлар, кўнгилсиз ҳодисалар содир бўлаётгани ҳақида хабар бериб турибди.
16 июль куни Озарбайжон Мудофаа вазирлиги Арманистон ҳудудидан мамлакат Қуролли Кучларининг позициясига ўт очилганини ва мазкур ҳаракатга жавоб қайтарилганини маълум қилди. Шунингдек, Озарбайжон президенти Илҳом Алиев Арманистонга тинчлик шартномаси имзолашни яна бир бор таклиф қилгани ҳақида хабар берилди.
Изоҳ (0)