Joriy yilning 27-iyul kuni Eriell Group (Xalqaro neft-servis kompaniyalar guruhi) ko‘magida Uxta davlat texnika universiteti (UDTU) taqdimoti va Rossiyaning eng yaxshi sohaviy, oliy o‘quv yurtlaridan biriga kirish istagida bo‘lgan o‘zbekistonlik abituriyentlarning konsultativ tanlab olinishi bo‘lib o‘tdi.
Eriell Group va UDTU o‘rtasida kelishuv tuzildi. Uning maqsadi kadrlar salohiyatini rivojlantirish, qo‘shma ta’lim faoliyati orqali tomonlar xodimlarini har tomonlama rivojlantirish va malakasini muttasil oshirishga ko‘maklashishdan iborat. UDTUda o‘qish istagida bo‘lgan O‘zbekiston yoshlari bildirayotgan katta qiziqishni hisobga olgan holda, mazkur oliy o‘quv yurti bunday imkoniyatni mamlakatimizning eng istiqbolli abituriyentlariga taqdim etdi.
Yosh mutaxassislarni har tomonlama qo‘llab-quvvatlash Eriell Group uchun ko‘p yillik an’anaga aylangan. Kompaniya turli, ikki tomonlama kelishuvlar doirasida o‘quv muassasalari bilan aloqalarni yo‘lga qo‘ygan va qo‘llab-quvvatlagan holda, iqtidorli talabalarning O‘zbekiston hamda yaqin xorijiy mamlakatlarning sohaviy ta’lim muassasalarida o‘qishini davom ettirishiga har tomonlama ko‘maklashmoqda. Bularning barchasi neft va gaz tarmog‘ida yosh, istiqbolli, yuqori malakali mutaxassislarni yetishtirishga xizmat qilmoqda.
UDTU taqdimotini o‘tkazish uchun O‘zbekistonga neft va gaz fakulteti dekani, geologiya-mineralogiya fanlari nomzodi Natalya Demchenko tashrif buyurdi.
Talabalar “Nef va gaz geologiyasi” va “Neft va gaz ishi” (bakalavriat, spetsialitet) yo‘nalishlariga qabul qilinadi. UDTUga o‘qishga kirishning yana bir mutlaq afzalligi shundaki, o‘qish davomida talabalarga bepul yotoqxona va davlat stipendiyasi taqdim etiladi.
Uxta davlat texnika universitetida o‘qish talabalarimiz tomonidan ular kelgusida amaliyotda qo‘llay oladigan, O‘zbekistonning korxona va tashkilotlari, umuman iqtisodiyotiga foyda keltiradigan chuqur bilimlar olishiga xizmat qiladi.
Ma’lumot uchun
UDTU — Rossiyaning Yevropa shimolidagi yirik, ko‘p tarmoqli texnik oliy o‘quv yurtlaridan biri, neft va gaz majmuasi yirik kompaniyalarining hamkori.
Yaqin va uzoq xorijiy mamlakatlar uchun mutaxassislar tayyorlashning yirik markazi sifatida UDTU xorijdagi yoshlar e’tiborini jalb qiladi. Bugungi kunda universitetda dunyoning 30 ta mamlakatidan qariyb 400 nafar talaba tahsil olmoqda.
UDTUda talaba va o‘qituvchilarning xorijda stajirovka o‘tashini ko‘zda tutuvchi qator xalqaro dasturlar, qo‘shma ilmiy va ta’lim loyihalari amal qilmoqda.
Eriell Group matbuot xizmati
Izoh (0)