Oliy va o‘rta maxsus ta’lim vazirligi xorij OTMlaridan o‘qishni O‘zbekistonga “perevod” qilishning o‘tish balini belgiladi.
Ma’lum qilinishicha, 2021/2022-o‘quv yili uchun xorijiy va nodavlat oliy ta’lim muassasalaridan Oliy va o‘rta maxsus ta’lim vazirligi tizimidagi oliy ta’lim muassasalariga o‘qishni ko‘chirish bo‘yicha 2020/2021-o‘quv yili uchun tasdiqlangan fanlar majmuasiga muvofiq 2 ta fandan o‘tkaziladigan maxsus sinovlar (test, kasbiy (ijodiy) imtihon) natijalariga ko‘ra o‘tish bali to‘plash mumkin bo‘lgan maksimal ballning 35 foizi (66,1 ball) etib belgilandi.
Shuningdek, o‘tkaziladigan maxsus sinovlar natijalariga ko‘ra belgilanadigan kontrakt-to‘lov summasi haqida ham ma’lumot berildi.
Vazirlik vakili Abduvali Xoliqovning so‘zlariga ko‘ra, boshqa vazirliklar tasarrufidagi OMTlar uchun o‘tish ballarini o‘sha vazirliklar o‘zi tasdiqlaydi. Masalan, tibbiyot OTMlari uchun Sog‘liqni saqlash vazirligi o‘tish balini belgilaydi. Shuningdek, 66,1 ball doim bir xil holda saqlanib qolmasligini ham bildirib o‘tgan.
“O‘qishni ko‘chirishda 1 yil oldingi kirish imtihonlaridagi maksimal ball asos qilib olinadi. Belgilangan bu o‘tish balli keyingi yillarda ham bir yil oldingi ballga qarab belgilanadi va o‘zgarishi mumkin”, — degan Xoliqov.
Eslatib o‘tamiz, 2021/2022-o‘quv yili uchun xorijiy va nodavlat oliy ta’lim muassasalaridan o‘qishni ko‘chirish bo‘yicha o‘tkaziladigan maxsus sinovlar natijasiga ko‘ra to‘plash mumkin bo‘lgan maksimal ball 189 ballni tashkil etadi.
Izoh (0)