O‘zbekistonda 2021-yilning 24-oktabr kuni bo‘lib o‘tadigan Prezident sayloviga YeXHT Demokratik institutlar va inson huquqlari bo‘yicha byurosining to‘laqonli missiyasini yuboradi. Bu haqda Markaziy saylov komissiyasining 23- iyul, juma kuni bo‘lib o‘tgan navbatdagi yig‘ilishida so‘z yuritildi, deya xabar bermoqda “Daryo” muxbiri.
MSK raisi o‘rinbosari Bahrom Qo‘chqorov “Xorijlik ekspertlarning ishtiroki O‘zbekiston uchun qanday ahamiyatga ega?”, degan savolga shunday javob qaytardi:
“Xorijlik kuzatuvchilarning ishtiroki biz uchun juda ham muhim masala. Saylov qonunchiligida 2019-yildan keyingi davrda bo‘lgan o‘zgarishlarning o‘zimiz ham guvohi bo‘lib turibmiz. O‘zgarishlarning aksariyati YeXHT Demokratik institutlar va inson huquqlari bo‘yicha byurosining Ehtiyojlarni baholash missiyasining tavsiyalari, ya’ni demokratik standartlarning milliy qonunchiligimizga joriy qilinishiga, davlatimizda demokratiyaning qaror topishiga bir asos bo‘lyapti. Saylov tizimimizga tashqaridan xolis ko‘z bilan qarash bizga juda muhim. Ularning bahosi bizning demokratik, ochiq saylov o‘tkazishimizga asos bo‘ladi.
Qolaversa, bu nafaqat saylov amaliyotini takomillashtirish, balki saylovchilarimizning saylov huquqini ta’minlab berish bilan ham bog‘liq. Bu kelajakda demokratik o‘zgarishlarga sabab bo‘lishi mumkin. Shuning uchun biz to‘laqonli kuzatuvchilar missiyasining yuborilishini so‘raganmiz. Taklifimiz byuro tomonidan qo‘llab-quvvatlanib, bo‘lajak saylovlarga 28 nafar uzoq muddatli kuzatuvchilar va 250 nafar qisqa muddatli kuzatuvchilar yuborilishi qaror qilindi. Ushbu missiyaning bahosi davlatimizning demokratik saylov tizimiga bahosidir hamda bu O‘zbekistonning dunyo miqyosidagi demokratik imijiga ijobiy ta’sir ko‘rsatadi, degan umiddamiz”, — dedi Qo‘chqorov.
Mavzuga doir:
Izoh (0)