Жорий йилнинг 27 июль куни Eriell Group (Халқаро нефть-сервис компаниялар гуруҳи) кўмагида Ухта давлат техника университети (УДТУ) тақдимоти ва Россиянинг энг яхши соҳавий, олий ўқув юртларидан бирига кириш истагида бўлган ўзбекистонлик абитуриентларнинг консултатив танлаб олиниши бўлиб ўтди.
Eriell Group ва УДТУ ўртасида келишув тузилди. Унинг мақсади кадрлар салоҳиятини ривожлантириш, қўшма таълим фаолияти орқали томонлар ходимларини ҳар томонлама ривожлантириш ва малакасини муттасил оширишга кўмаклашишдан иборат. УДТУда ўқиш истагида бўлган Ўзбекистон ёшлари билдираётган катта қизиқишни ҳисобга олган ҳолда, мазкур олий ўқув юрти бундай имкониятни мамлакатимизнинг энг истиқболли абитуриентларига тақдим этди.
Ёш мутахассисларни ҳар томонлама қўллаб-қувватлаш Eriell Group учун кўп йиллик анъанага айланган. Компания турли, икки томонлама келишувлар доирасида ўқув муассасалари билан алоқаларни йўлга қўйган ва қўллаб-қувватлаган ҳолда, иқтидорли талабаларнинг Ўзбекистон ҳамда яқин хорижий мамлакатларнинг соҳавий таълим муассасаларида ўқишини давом эттиришига ҳар томонлама кўмаклашмоқда. Буларнинг барчаси нефть ва газ тармоғида ёш, истиқболли, юқори малакали мутахассисларни етиштиришга хизмат қилмоқда.
УДТУ тақдимотини ўтказиш учун Ўзбекистонга нефть ва газ факультети декани, геология-минералогия фанлари номзоди Наталья Демченко ташриф буюрди.
Талабалар «Неф ва газ геологияси» ва «Нефть ва газ иши» (бакалавриат, специалитет) йўналишларига қабул қилинади. УДТУга ўқишга киришнинг яна бир мутлақ афзаллиги шундаки, ўқиш давомида талабаларга бепул ётоқхона ва давлат стипендияси тақдим этилади.
Ухта давлат техника университетида ўқиш талабаларимиз томонидан улар келгусида амалиётда қўллай оладиган, Ўзбекистоннинг корхона ва ташкилотлари, умуман иқтисодиётига фойда келтирадиган чуқур билимлар олишига хизмат қилади.
Маълумот учун
УДТУ — Россиянинг Европа шимолидаги йирик, кўп тармоқли техник олий ўқув юртларидан бири, нефть ва газ мажмуаси йирик компанияларининг ҳамкори.
Яқин ва узоқ хорижий мамлакатлар учун мутахассислар тайёрлашнинг йирик маркази сифатида УДТУ хориждаги ёшлар эътиборини жалб қилади. Бугунги кунда университетда дунёнинг 30 та мамлакатидан қарийб 400 нафар талаба таҳсил олмоқда.
УДТУда талаба ва ўқитувчиларнинг хорижда стажировка ўташини кўзда тутувчи қатор халқаро дастурлар, қўшма илмий ва таълим лойиҳалари амал қилмоқда.
Eriell Group матбуот хизмати
Изоҳ (0)