O‘zbekistonning doimiy aholisi soni 2021-yil 1-iyul holatiga ko‘ra 34,86 million kishini tashkil etib, yil boshidan 301,3 ming kishiga yoki 0,9 foizga ko‘paydi. Bu haqda Davlat statistika qo‘mitasining mamlakatdagi demografik vaziyatga bag‘ishlangan hisobotida so‘z boradi.
Jumladan, shahar aholisi soni 17,7 million kishini (jami aholi sonidagi ulushi 50,7 foiz), qishloq aholisi soni esa 17,2 million kishini (49,3 foiz) tashkil etgan.
Viloyatlar kesimida tahlillar shuni ko‘rsatmoqdaki, hududlarning respublika jami aholisi sonidagi ulushi bo‘yicha eng ko‘p ko‘rsatkich Samarqand viloyatida — 11,4 foizni, keyingi o‘rinlarda Farg‘ona viloyati — 11,1 foizni, Qashqadaryo viloyati — 9,6 foizni va Andijon viloyati — 9,2 foizni tashkil etgan.
Respublika doimiy aholisi sonining 31,1 foizi — mehnatga layoqatli yoshdan kichiklar, 58 foizi — mehnatga layoqatli yoshdagilar va 10,9 — foizi mehnatga layoqatli yoshdan kattalar hissasiga to‘g‘ri kelmoqda.
2021-yilning yanvar—iyun oylarida mamlakatda 390,7 mingta bola tug‘ilgani qayd etilgan bo‘lib, bu 2020-yilning birinchi yarim yilligiga nisbatan qariyb 7 foizga ko‘p demak (365,6 ming). Mos ravishda 1000 aholiga nisbatan tug‘ilish koeffitsiyenti 22,7 promilleni tashkil etgan hamda 2020-yilga nisbatan 1,1 promillega oshganligi kuzatilgan (2020- yilda 21,6 promilleni tashkil etgan).
Tug‘ilganlar soni oylar bo‘yicha tahlil etilganda eng ko‘p qayd etilgan tug‘ilganlar soni 2020-yilda iyun oyida (74 448 kishi) kuzatilgan bo‘lsa, 2021-yilda ham iyun oyiga (78 888 kishi) to‘g‘ri kelgan. Aksincha, eng kam qayd etilgan tug‘ilganlar soni 2020-yilda aprel oyida (55 161 kishi) kuzatilgan bo‘lsa, 2021-yilda fevral oyida (53 759 kishi) kuzatilgan.
2021-yilning dastlabki olti oyida 79,7 mingta o‘lim qayd etilgan bo‘lib, har 1000 aholiga o‘lim koeffitsiyenti 4,6 promilleni tashkil etgan hamda 2020-yilga nisbatan 0,2 promillega oshgan (2020-yilning yanvar— iyun oylarida 4,4 promille bo‘lgan).
2021-yilning yanvar— iyun oylarida vafot etganlar hududlar bo‘yicha tahlil etilganda har 1000 aholiga nisbatan eng ko‘p o‘lim holati Toshkent shahrida (6 promille) qayd etilgan. Aksincha, har 1000 aholiga nisbatan eng kam o‘lim holati Jizzax va Qashqadaryo viloyatlarida (4 promille) qayd etildi.
Dastlabki olti oy davomida qayd etilgan o‘lim holatining 61,4 foizi — qon aylanish tizimi kasalliklaridan, 9,4 foizi – o‘simtalardan, 5,7 foizi — baxtsiz hodisa, zaharlanish va jarohatlanishlardan, 4,9 foizi — ovqat hazm qilish a’zolari kasalliklaridan, 4,5 foizi — nafas olish a’zolari kasalliklaridan, 1,9 foizi — yuqumli va parazitar kasalliklardan hamda 12,2 foizi — boshqa kasalliklardan vafot etgan.
Ro‘yxatga olingan bir yoshgacha vafot etgan bolalarning 59,2 foizi — perinatal davrda yuzaga keladigan holatlardan, 18,4 foizi — nafas olish a’zolari kasalliklaridan, 11,4 foizi – tug‘ma anomaliyalardan, 2,8 foizi — yuqumli va parazitar kasalliklardan, 1,8 foizi — baxtsiz hodisa, zaharlanish va jarohatlanishlardan, 0,7 foizi — ovqat hazm qilish a’zolari kasalliklaridan va 5,7 foizi — boshqa kasalliklardan vafot etgan.
2021-yilning o‘tgan yarim yilligida 119 mingta nikoh qayd etilgan bo‘lib, bu 2020-yilning mos davrida nisbatan 1,6 barobarga ko‘p demak (75,6 ming).
Eng yuqori nikoh koeffitsiyenti (promilleda) Xorazm viloyati (8,2), Qoraqalpog‘iston Respublikasi (8,2), Buxoro viloyati (7,8) va Toshkent shahrida (7,5) kuzatilgan. Eng kam nikoh tuzish koeffitsiyenti esa Andijon (6), Namangan (6), Qashqadaryo (6,1) va Farg‘ona (6,4) viloyatlarida kuzatilgan.
2021-yilning yanvar—iyul oylarida ajrimlar soni 19,4 mingtani tashkil etgan, bu 2020-yilning birinchi yarim yilligiga nisbatan 1,5 barobarga ko‘p (12,8 ming). Ta’kidlash kerakki, 2018 va 2019-yillarda ajrimlar soni birinchi yarim yillikda nisbatan barqaror bo‘lgan — mos ravishda 16,4 va 16 ming.
Eng yuqori nikohdan ajrashganlar koeffitsiyenti (promilleda) Toshkent shahri (2,1), Sirdaryo (1,5), Toshkent (1,4) va Navoiy (1,3) viloyatlarida qayd etilgan.
Izoh (0)