O‘zbekiston Prezidenti “Davlat xizmatlari ko‘rsatish infratuzilmasini takomillashtirish va aholining davlat xizmatlaridan foydalanish imkoniyatlarini kengaytirish chora-tadbirlari to‘g‘risida”gi farmonni imzoladi. Bu haqda Adliya vazirligi matbuot xizmati xabar berdi.
Farmonga ko‘ra, 2021-yil 1-noyabrdan “Ijtimoiy himoya yagona reyestri” axborot tizimida ro‘yxatga olingan shaxslarga, shuningdek, I va II guruh nogironligi bo‘lgan shaxslarga davlat xizmatlari markazlari va (yoki) Yagona interaktiv davlat xizmatlari portali (YaIDXP) orqali davlat xizmatlarini ko‘rsatishda davlat bojlari, yig‘imlar va boshqa har qanday to‘lovlar bo‘yicha 50 foiz miqdorida chegirma qo‘llaniladi (tadbirkorlik faoliyati maqsadlarida yoki yuridik shaxslar vakili sifatida murojaat qilingan holatlar bundan mustasno).
Ushbu sanadan boshlab, Davlat xizmatlari markazlari, “Litsenziya” axborot tizimi hamda YaIDXP orqali ko‘rsatilayotgan davlat xizmatlari belgilangan muddatidan uch ish kunidan ortiq vaqtga kechiktirilganda ariza beruvchilarning murojaatlariga asosan, xizmatdan foydalanish uchun to‘langan davlat bojlari, yig‘imlar va boshqa har qanday to‘lovlarning 50 foizi ularga 1 ish kunida qaytariladi. Bunda ariza beruvchiga tegishli davlat xizmati bepul ko‘rsatiladi.
Bundan tashqari, O‘zbekistonda doimiy yashamaydigan chet el fuqarolari va fuqaroligi bo‘lmagan shaxslarga jismoniy shaxsning shaxsiy identifikatsiya raqami soddalashtirilgan tartibda tuman (shahar) migratsiya va fuqarolikni rasmiylashtirish bo‘linmalarida hamda davlat xizmatlari markazlarida amalga oshiriladi.
Farmon bilan litsenziya, ruxsatnoma, sertifikat va boshqa ruxsat etish xususiyatiga ega hujjatlarning dublikatini berish uchun milliy valyutada belgilangan to‘lovlar BHMning 10 foizigacha miqdorda belgilanadi (qonunchilik hujjatlarida to‘lovlar belgilanmagan yoki bazaviy hisoblash miqdorining 10 foizidan kam miqdorda belgilangan hollar bundan mustasno).
Avvalroq O‘zbekistonda ID-karta va “zagranpasport”ni DXM orqali ham olish mumkin bo‘lishi, mashinaning YTHga uchraganini tekshirish imkonini beruvchi “Avtomobil tarixi” davlat xizmati yo‘lga qo‘yilishi to‘g‘risida xabar berilgandi.
Izoh (0)