Afg‘oniston poytaxti Kobul politsiyasi “Tolibon” jangarilarini Qurbon hayiti nishonlangan kuni prezident saroyini raketa bilan o‘qqa tutganlikda aybladi, deb xabar bermoqda “Interfaks”.
“To‘rt nafar terrorchi, shu jumladan, ularning boshlig‘i Momen — ularning barchasi ‘Tolibon’ harakati a’zolari — Afg‘oniston poytaxtining beshinchi ma’muriy tumani hududida olib borilgan maxsus kuchlarning operatsiyasi chog‘ida qo‘lga olindi. Guruh boshlig‘i Kobulning Pagman uyezdi hududida hukumat kuchlariga uyushtirilgan hujumlarning ishtirokchisi bo‘lgan”, — deya Tolo News Afg‘oniston Ichki ishlar vazirligi vakili Mirvays Stanezayga tayanib xabar qildi.
20-iyul — Qurbon hayiti kuni Arg prezident saroyi hududida davlat rahbari, uning o‘rinbosarlari, hukumat a’zolari, parlament deputatlari, siyosat va jamoat arboblari ishtirokida hayit namozi o‘qilayotgan vaqtda saroyga bir nechta raketa otilgan. Jabrlanganlar haqida ma’lumot kelib tushmagan.
Ayni paytda Afg‘onistondan AQSh qo‘shinlarining olib chiqilishi fonida mamlakatda hukumat va “Tolibon” o‘rtasidagi ziddiyat kuchaygan.
Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak. So‘nggi ma’lumotlarga ko‘ra, AQSh Afg‘onistondagi harbiy kontingentining 90 foizdan ko‘prog‘ini olib chiqib ketdi.
Germaniya, Italiya va Avstraliya esa Afg‘onistondan o‘z qo‘shinlarini olib chiqishni yakunladi.
Mavzuga doir:
Izoh (0)