Афғонистон пойтахти Кобул полицияси «Толибон» жангариларини Қурбон ҳайити нишонланган куни президент саройини ракета билан ўққа тутганликда айблади, деб хабар бермоқда «Интерфакс».
«Тўрт нафар террорчи, шу жумладан, уларнинг бошлиғи Момен — уларнинг барчаси ‘Толибон’ ҳаракати аъзолари — Афғонистон пойтахтининг бешинчи маъмурий тумани ҳудудида олиб борилган махсус кучларнинг операцияси чоғида қўлга олинди. Гуруҳ бошлиғи Кобулнинг Пагман уезди ҳудудида ҳукумат кучларига уюштирилган ҳужумларнинг иштирокчиси бўлган», — дея Tolo News Афғонистон Ички ишлар вазирлиги вакили Мирвайс Станезайга таяниб хабар қилди.
20 июль — Қурбон ҳайити куни Арг президент саройи ҳудудида давлат раҳбари, унинг ўринбосарлари, ҳукумат аъзолари, парламент депутатлари, сиёсат ва жамоат арбоблари иштирокида ҳайит намози ўқилаётган вақтда саройга бир нечта ракета отилган. Жабрланганлар ҳақида маълумот келиб тушмаган.
Айни пайтда Афғонистондан АҚШ қўшинларининг олиб чиқилиши фонида мамлакатда ҳукумат ва «Толибон» ўртасидаги зиддият кучайган.
Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак. Сўнгги маълумотларга кўра, АҚШ Афғонистондаги ҳарбий контингентининг 90 фоиздан кўпроғини олиб чиқиб кетди.
Германия, Италия ва Австралия эса Афғонистондан ўз қўшинларини олиб чиқишни якунлади.
Изоҳ (0)