Fransiya parlamenti ommaviy norozilik namoyishlari fonida 24-iyul, shanba kuni mamlakatda sanitariya hujjatini joriy etishni ko‘zda tutadigan qonunning ba’zi nizomlarini yumshatishga qaror qildi, deb yozadi “Korrespondent.net”.
Fransiya hukumati koronavirusga qarshi vaksinatsiyani tezlashtirish maqsadida 30-avgustdan 12 yoshdan oshgan fuqarolar uchun sanitariya hujjatlarini joriy qilishni rejalashtirgan edi. Hujjat aksariyat jamoat joylari, shu jumladan, shahar va shaharlararo transportdan foydalanish huquqini beradi.
Bunday hujjatni olish uchun fransuzlar COVID-19’ga qarshi to‘liq emlanishi yoki yaqinda olingan manfiy natijali testni taqdim etishi kerak. Bundan tashqari, qonun barcha tibbiyot xodimlariga koronavirusga qarshi emlanish majburiyatini yuklaydi, aks holda ular ishdan bo‘shatiladi.
Bunday tashabbus aholi orasida salbiy munosabatni keltirib chiqardi, shu sababli mamlakatning turli shaharlarida minglab odamlar ko‘chalarga chiqib, o‘z noroziligini bildirdi. Namoyishchilarning soni 160 mingdan ortiq deya baholandi.
Shu munosabat bilan Fransiya Senati a’zolari ushbu qonunni yumshatish uchun ba’zi tuzatishlarni kiritdi. Xususan, sanitariya hujjatlari faqat kattalar uchun majburiy bo‘ldi, kafe va restoranlar ayvonlariga esa bemalol kirish mumkin (hujjatsiz), qonun esa 30-avgustdan emas, 15-sentabrdan kuchga kiradi.
Avvalroq Fransiyada koronavirusning to‘rtinchi to‘lqini boshlangani e’lon qilingandi. Koronavirus bilan kasallanish holatlari soni bir haftada 125 foizga oshgan. 80 foiz holatlarda odamlar delta shtammga chalinmoqda.
Izoh (0)