Surxondaryo viloyati Termiz shahrida voyaga yetmagan bola Damas avtomobilini boshqarib ketayotganida YPX xodimlari tomonidan to‘xtatildi, deb xabar beradi IIV YHXBB axborot xizmati.
Videodan ko‘rish mumkinki, shaharning “Amir Temur” mahallasida 6-sinfni tamomlagan 12 yoshli bola Damas avtomobilini haydab kelayotganida to‘xtatilgan. Uning so‘zlariga ko‘ra, mashinani boshqarishga yo‘lda dadasi ruxsat bergan.
“Haydashni biladi-da… Mashina haydashga qizqadi”, — deya avtomobil egasi o‘zining xatti-harakatini izohlagan.
Qoidabuzar haydovchi bilan olib borilgan suhbat davomida u spirtli ichimlik ichgani aniqlangan.
Mazkur holat yuzasidan Ma’muriy javobgarlik to‘g‘risidagi kodeksning 131(transport vositalarini mast holda boshqarish) va 135-moddalari (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) bo‘yicha ma’muriy bayonnoma rasmiylashtirilib, ish hujjatlari sudga yuborilgan.
Avvalroq Surxondaryoda 13 yoshli jiyaniga “KamAZ” haydashga ruxsat bergan fuqaroga chora ko‘rilgani, Surxondaryoda haydovchilik guvohnomasi bo‘lmagan yigit boshqaruvidagi Nexia pastlikka tushib ketishi oqibatida mashina ichida bo‘lgan 17 yoshli qiz voqea joyida vafot etgani to‘g‘risida xabar berilgandi.
Izoh (0)