Ukrainalik bloger Roma Urraco o‘zining YouTube’dagi kanaliga navbatdagi noodatiy topilma — ikkinchi va uchinchi avlod “GAZ-21” avtomobillari namoyish etilgan videoni joylashtirdi. Ikkala noyob avtomobil ham ajoyib holatda saqlangan. Shu bilan birga, rolik muallifining so‘zlariga ko‘ra, transport vositalari hech qachon restavratsiya qilinmagan, bu esa “vaqt kapsulalari”ning qiymatini yanada oshiradi, deb yozadi Motor.
Namoyish etilgan mashinalarning birinchisi 1960-yilgi ikkinchi avlod “Volga”si hisoblanadi. Avtomobil kuzovi kamyob, ishlab chiqaruvchi nomenklaturasida “qahvali” deb ataluvchi rangga bo‘yalgan. “GAZ-21” SSSRda yashagan va asosan mamlakatning shimoliy hududlarida ishlagan fuqaroga tegishli bo‘lgan. Shu sababli mashina egasi o‘z avtomobilidan juda kam hollarda foydalangan — hozirga qadar 43 118 kilometr yo‘l bosgan. Bundan o‘n yillar oldin noyob “Volga” Donetsk viloyatidan topilgan va o‘shandan buyon u xususiy kolleksiyada saqlanmoqda.
Ikkinchi “vaqt kapsulasi” 1967-yilda konveyerdan chiqqan “GAZ-21” modeli hisoblanadi. Mazkur modifikatsiyaning o‘ziga xosligi “kit mo‘ylovi” uslubida yaratilgan radiator panjarasi, shuningdek, kapotida bug‘u figurasining yo‘qligida. Ushbu “Volga”ning tarixi yanada qiziq. Mashina o‘tgan asrning o‘rtalarida zaporojyelik ayolga uylangan Italiya fuqarosiga tegishli bo‘lgan. Farzandlari dunyoga kelgach, erkak ikkita bir xil “Volga” sotib olgan.
Oradan yillar o‘tgach, Apennin yarimoroli fuqarosi Sobiq ittifoqni tark etib, ikkala “GAZ-21”ni ham rafiqasiga tashlab ketgan. Avtomobillarning biridan deyarli har kuni foydalanilgan, ikkinchi “Volga” esa garajda saqlangan. 16,4 ming kilometr yo‘l bosgan transport vositasi hozirda o‘z xaridorini topgan.
Avvalroq Rossiyada oddiy “Volga” eng qimmat Toyota Land Cruiser 300 narxida sotuvga qo‘yilgani to‘g‘risida xabar berilgandi.
Izoh (0)