“Auto.ru” saytida 10 ming kilometr yo‘l bosgan 1961-yilgi qora “GAZ-13” avtomobili sotuvga qo‘yilgani to‘g‘risida e’lon paydo bo‘ldi. Sotuvchi sovet limuziniga hukumat avtomobiliga hamrohlik qilishda foydalanilgan “Ural” mototsiklini ham qo‘shib beradi. Ikkala transport vositasi 8,3 million rublga (112 ming dollar) baholanmoqda, deb xabar beradi Motor.
Sotuvchining so‘zlariga ko‘ra, 60 yillik “GAZ-13”dan 1957-yildan 1985-yilga qadar SSSR tashqi ishlar vaziri Andrey Gromiko almashib foydalangan. Kremlning maxsus maqsadlarga mo‘ljallangan garajida ishlagan “Chayka” bir necha yil oldin to‘liq texnik ta’mirlashdan o‘tgan, shu sababli hozirda ideal soz holatda. Suratlarga ko‘ra, limuzinning tashqi ko‘rinishi ham yaxshi saqlangan.
Hukumat “GAZ-13”iga 195 ot kuchini taqdim etishga qodir 5,5 litrli V8 dvigateli o‘rnatilgan. Agregat uch pog‘onali avtomatik transmissiya yordamida boshqariladi. Orqa uzatmali limuzin soatiga 100 kilometr tezlikka 20 soniyada erishadi. Maksimal tezligi — 160 kilometr/soat.
Sotuvchining ta’kidlashicha, avtomobil hozirga qadar 10 ming kilometr yo‘l bosgan xolos.
“Chayka”ga qo‘shib uni kuzatib borishga mo‘ljallangan sirena va mayoqli “Ural” mototsikli ham beriladi. Biroq e’londa uning surati keltirilmagan.
Avvalroq Moskvada xususiy kolleksiyada saqlanayotgan 65 yillik “GAZ-12 ZIM” sotuvga qo‘yilgani to‘g‘risida xabar berilgandi. 90 ot kuchiga ega dvigatel o‘rnatilgan va hozirga qadar 60 ming kilometr yo‘l bosgan noyob avtomobilni 7,7 million rublga (105 ming dollar) baholangan edi.
Izoh (0)