Xorazmda haydovchilik guvohnomasi bo‘lmagan 10-sinf o‘quvchisi boshqaruvidagi Lacetti Damas’ga urildi. YTH oqibatida uch kishi halok bo‘ldi

Xorazm viloyati Urganch tumanida tegishli hujjatlarsiz Lacetti’ni boshqarib ketayotgan 10-sinf o‘quvchisi Damas’ga urilib, yo‘l-transport hodisasini sodir etdi, deb xabar beradi IIV YHXBB axborot xizmati.

Ma’lum qilinishicha, 6-may kuni soat 15:30 larda haydovchilik guvohnomasiga ega bo‘lmagan maktab o‘quvchisi E.B. Lacetti’ni Urganch tumani hududidan o‘tgan 4P-162 sonli katta aylanma yo‘li bo‘ylab boshqarib ketayotib, yo‘lning qarama-qarshi tarafiga chiqib ketgan va Damas bilan to‘qnashuv sodir etgan.

Oqibatda uch kishi halok bo‘lgan, yana ikki fuqaro turli tan jarohatlari bilan shifoxonaga yotqizilgan.

Mazkur holat yuzasidan Urganch tumani IIB Tergov bo‘limi tomonidan Jinoyat kodeksi 266-modda (transport vositalari harakati yoki ulardan foydalanish xavfsizligi qoidalarini buzish) 3-qismi “a” bandi bilan jinoyat ishi qo‘zg‘atilgan.

Avvalroq Toshkentda mashina boshqarish huquqidan mahrum qilingan Spark haydovchisi piyodani urib yuborgani to‘g‘risida xabar berilgandi.