Сурхондарё вилояти Термиз шаҳрида вояга етмаган бола Damas автомобилини бошқариб кетаётганида ЙПХ ходимлари томонидан тўхтатилди, деб хабар беради ИИВ ЙҲХББ ахборот хизмати.
Видеодан кўриш мумкинки, шаҳарнинг «Амир Темур» маҳалласида 6-синфни тамомлаган 12 ёшли бола Damas автомобилини ҳайдаб келаётганида тўхтатилган. Унинг сўзларига кўра, машинани бошқаришга йўлда дадаси рухсат берган.
«Ҳайдашни билади-да… Машина ҳайдашга қизқади», — дея автомобиль эгаси ўзининг хатти-ҳаракатини изоҳлаган.
Қоидабузар ҳайдовчи билан олиб борилган суҳбат давомида у спиртли ичимлик ичгани аниқланган.
Мазкур ҳолат юзасидан Маъмурий жавобгарлик тўғрисидаги кодекснинг 131(транспорт воситаларини маст ҳолда бошқариш) ва 135-моддалари (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) бўйича маъмурий баённома расмийлаштирилиб, иш ҳужжатлари судга юборилган.
Аввалроқ Сурхондарёда 13 ёшли жиянига «КамАЗ» ҳайдашга рухсат берган фуқарога чора кўрилгани, Сурхондарёда ҳайдовчилик гувоҳномаси бўлмаган йигит бошқарувидаги Nexia пастликка тушиб кетиши оқибатида машина ичида бўлган 17 ёшли қиз воқеа жойида вафот этгани тўғрисида хабар берилганди.
Изоҳ (0)