Shavkat Mirziyoyev Toshkentda yuqori darajali xalqaro konferensiya tadbirlarida ishtirok etayotgan BMT bosh kotibi o‘rinbosari, Yevropa iqtisodiy komissiyasi (YeIK) ijrochi kotibi Olga Algayerovani qabul qildi, deb xabar bermoqda Prezident matbuot xizmati.
Ta’kidlanishicha, davlat rahbari BMT institutlari bilan keyingi yillarda sifat jihatidan yangi bosqichga ko‘tarilgan sheriklik jadal rivojlanib borayotganini mamnuniyat bilan qayd etdi. Tashkilot O‘zbekistondagi islohotlarga ko‘maklashayotgani uchun minnatdorlik bildirdi.
Olga Algayerova O‘zbekiston Prezidentiga BMT bosh kotibi Antoniu Guterrishning salomi va yuksak hurmat-ehtirom so‘zlarini yetkazdi. O‘zbekistonning global maydondagi nufuzi ortib borayotgani, xalqaro hamjamiyat O‘zbekiston yetakchisining, shu jumladan, Markaziy va Janubiy Osiyo bog‘liqligini kuchaytirish bo‘yicha tashabbuslarini keng qo‘llab-quvvatlayotganini ta’kidladi.
Ijrochi kotib Orolbo‘yini ekologik innovatsiyalar va texnologiyalar hududi sifatida e’lon qilish bo‘yicha BMT Bosh Assambleyasining rezolyutsiyasi qabul qilinganini hamda O‘zbekistonning Markaziy Osiyo mamlakatlari uchun BMT Maxsus komissiyasidagi (SPEKA) raisligini yuksak baholadi.
Uchrashuvda, shuningdek, O‘zbekiston va YeIK o‘rtasida barqaror rivojlanish maqsadlariga erishish va pandemiya oqibatlarini yengib o‘tish borasida, jumladan, iqtisodiyot, savdo va transport, innovatsiyalar, ekologiya va boshqa sohalar bo‘yicha o‘zaro manfaatli hamkorlikni kengaytirish istiqbollari muhokama qilindi.
Eslatib o‘tamiz, Toshkent shahrida 16-iyul kuni “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusida xalqaro konferensiya o‘z ishini boshladi. Shavkat Mirziyoyev tashabbusi bilan tashkil etilgan anjumanda Afg‘oniston prezidenti, Pokiston bosh vaziri, Markaziy va Janubiy Osiyo davlatlarining tashqi ishlar vazirlari, jami 44 ta mamlakat va 30 ga yaqin xalqaro tashkilot delegatsiyalari, nufuzli xorijiy ilmiy-tadqiqot va tahlil markazlari rahbarlari ishtirok etdi.
Konferensiya doirasida Shavkat Mirziyoyev Xitoy, Rossiya, Hindiston, Qozog‘iston, Turkmaniston tashqi ishlar vazirlarini, Qirg‘iziston delegatsiyasiga rahbarlik qilgan iqtisodiyot va moliya vazirini qabul qildi.
Davlat rahbari, shuningdek, Afg‘oniston hamda Pokiston prezidenti bilan uchrashdi, Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrelni qabul qildi.
Izoh (0)