Rossiya tashqi ishlar vaziri Sergey Lavrov 16-iyul kuni bo‘lib o‘tgan “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiya yakunlari bo‘yicha jurnalistlarga bergan intervyusida afg‘on askarlarini Markaziy Osiyo mamlakatlarida joylashtirish rejasiga munosabat bildirdi.
“Amerikaliklarning rejasiga kelsak, ular buni yashirmayapti, faol ravishda oshkor qilyapti. Birinchidan, Markaziy Osiyo va Pokiston mamlakatlarini amerikaliklar Afg‘onistondan olib chiqib ketayotgan harbiy infratuzilmaning bir qismini joylashtirishga ko‘ndirishga harakat qilmoqda. Ammo Pokiston va O‘zbekiston bunday bo‘lmasligini rasman ma’lum qilgan. Ular o‘z hududlarida bunday infrastrukturani joylashtirmoqchi emas”, — degan Lavrov.
Uning ta’kidlashicha, Markaziy Osiyo va Rossiya Tashqi ishlar vazirliklari rahbarlarining uchrashuvida ushbu davlatlarning hech qaysi biri o‘z hududlari va aholisini bunday xavfga duchor qilish niyatini bildirmagan.
Markaziy Osiyo davlatlari rahbarlari bu niyatlardagi barcha xavf-xatarlarni yaxshi tushunmoqda va o‘z manfaatlaridan kelib chiqib to‘g‘ri qaror qabul qiladi.
“Amerikaliklarning yana bir tashabbusi — ular bilan hamkorlik qilgan afg‘onlarni mamlakatdan olib ketish va Markaziy Osiyo davlatlari hududlariga vaqtincha yoki doimiy ravishda joylashtirishga harakat qilayotganini muhokama qildik. Dastlab, gap 10 ming kishi haqida ketgandi. Yaqinda men AQShdagi turli xil siyosiy ilm-fan markazlarida amerikaliklar munozaralari doirasida yil oxiriga kelib yuz ming kishilik raqam qayd etib o‘tilganini eshitgandim. Bugun ham markaziy osiyolik hamkasblarim tomonidan aytib o‘tildi. Ular bu niyatlardagi barcha xavf-xatarlarni yaxshi tushunmoqda. Umid qilamanki, ular o‘z manfaatlaridan kelib chiqib to‘g‘ri qaror qabul qilishadi”, — deb ta’kidlagan Rossiya tashqi ishlar vaziri.
Eslatib o‘tamiz, Prezident matbuot kotibi Sherzod Asadov Amerika hukumati tomonidan O‘zbekistonga afg‘on askarlarini vaqtincha o‘zining hududida saqlab turish bo‘yicha so‘rov bo‘lmaganini ma’lum qilgandi. “AQSh tomonidan bunday so‘rov bo‘lganini men bilmayman. O‘zbekistonga hech qanday rasmiy taklif bo‘lmagan. Biz bu vaziyatda, avvalo, Afg‘onistonni gumanitar va iqtisodiy tomondan qo‘llab-quvvatlab, yordamimizni ko‘rsatishimiz mumkin”, — degan edi Sherzod Asadov.
Shuningdek, 2012-yilda qabul qilingan “O‘zbekiston Respublikasining tashqi siyosiy faoliyati Konsepsiyasini tasdiqlash to‘g‘risida”gi va “Mudofaa to‘g‘risida”gi qonunga muvofiq, O‘zbekiston hududida hech qanday xorijiy harbiy bazalarning joylashtirilishi mumkin emasligi va O‘zbekiston hech qanday harbiy-siyosiy bloklarga ham qo‘shila olmasligini aytgandi.
Izoh (0)