Шавкат Мирзиёев Тошкентда юқори даражали халқаро конференция тадбирларида иштирок этаётган БМТ бош котиби ўринбосари, Европа иқтисодий комиссияси (ЕИК) ижрочи котиби Ольга Алгаеровани қабул қилди, деб хабар бермоқда Президент матбуот хизмати.
Таъкидланишича, давлат раҳбари БМТ институтлари билан кейинги йилларда сифат жиҳатидан янги босқичга кўтарилган шериклик жадал ривожланиб бораётганини мамнуният билан қайд этди. Ташкилот Ўзбекистондаги ислоҳотларга кўмаклашаётгани учун миннатдорлик билдирди.
Ольга Алгаерова Ўзбекистон Президентига БМТ бош котиби Антониу Гутерришнинг саломи ва юксак ҳурмат-эҳтиром сўзларини етказди. Ўзбекистоннинг глобал майдондаги нуфузи ортиб бораётгани, халқаро ҳамжамият Ўзбекистон етакчисининг, шу жумладан, Марказий ва Жанубий Осиё боғлиқлигини кучайтириш бўйича ташаббусларини кенг қўллаб-қувватлаётганини таъкидлади.
Ижрочи котиб Оролбўйини экологик инновациялар ва технологиялар ҳудуди сифатида эълон қилиш бўйича БМТ Бош Ассамблеясининг резолюцияси қабул қилинганини ҳамда Ўзбекистоннинг Марказий Осиё мамлакатлари учун БМТ Махсус комиссиясидаги (СПЕКА) раислигини юксак баҳолади.
Учрашувда, шунингдек, Ўзбекистон ва ЕИК ўртасида барқарор ривожланиш мақсадларига эришиш ва пандемия оқибатларини енгиб ўтиш борасида, жумладан, иқтисодиёт, савдо ва транспорт, инновациялар, экология ва бошқа соҳалар бўйича ўзаро манфаатли ҳамкорликни кенгайтириш истиқболлари муҳокама қилинди.
Эслатиб ўтамиз, Тошкент шаҳрида 16 июль куни «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусида халқаро конференция ўз ишини бошлади. Шавкат Мирзиёев ташаббуси билан ташкил этилган анжуманда Афғонистон президенти, Покистон бош вазири, Марказий ва Жанубий Осиё давлатларининг ташқи ишлар вазирлари, жами 44 та мамлакат ва 30 га яқин халқаро ташкилот делегациялари, нуфузли хорижий илмий-тадқиқот ва таҳлил марказлари раҳбарлари иштирок этди.
Конференция доирасида Шавкат Мирзиёев Хитой, Россия, Ҳиндистон, Қозоғистон, Туркманистон ташқи ишлар вазирларини, Қирғизистон делегациясига раҳбарлик қилган иқтисодиёт ва молия вазирини қабул қилди.
Давлат раҳбари, шунингдек, Афғонистон ҳамда Покистон президенти билан учрашди, Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррелни қабул қилди.
Изоҳ (0)