Toshkent shahri Yashnobod tumanida fuqaroning xorijdagi o‘qishini Toshkent tibbiyot akademiyasiga ko‘chirib berish evaziga undan pul olgan shaxs qo‘lga olindi. Bu haqda Bosh prokuratura huzuridagi Departament xabar berdi.
Ma’lum qilinishicha, Bosh prokuratura huzuridagi Departament hamda DXXning Yashnobod tumani bo‘limlari tomonidan tezkor tadbir o‘tkazilgan. Tadbirda T.I. ismli shaxs fuqaro Sh.ning ishonchiga kirib, unga O‘sh davlat universitetining 1-kursini tamomlagani to‘g‘risida hujjatlarni rasmiylashtirib berishni, keyinchalik esa yuqori lavozimda ishlovchi tanishlari yordamida o‘qishini Toshkent tibbiyot akademiyasiga ko‘chirtirishini va’da qilgan.
Buning evaziga u fuqaro Sh.dan 6 ming dollarni firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Jizzaxda 18 ming dollar evaziga ikki fuqaroni xorij universitetiga o‘qishga kiritib qo‘yishni va’da qilgan shaxslar ushlangani, Navoiy davlat pedagogika institutiga o‘qishga kiritib qo‘yishni va’da qilib, fuqarodan 2 ming dollar olgan shaxs qo‘lga olingani to‘g‘risida xabar berilgandi.
Izoh (0)