Netflix striming servisi o‘z foydalanuvchilariga film va seriallardan tashqari, o‘yinlarni ham taklif etishni rejalashtirmoqda. 2021-yilning bahorida platforma videoo‘yinlar yo‘nalishi bo‘yicha rahbar lavozimini ochgandi, deb xabar beradi “Korrespondent.net”.
Natijada ushbu lavozimni bunga qadar Electronic Arts nashriyotining mobil bo‘linmasiga rahbarlik qilgan va Facebook’ning VR-yo‘nalishini boshqargan Mayk Verdu egallagan edi.
Verdu servisning o‘yin yo‘nalishini boshqaradi, shu sababli 2022-yildan Netflix’da videoo‘yinlar ham paydo bo‘ladi.
Ta’kidlanishicha, bu bilan striming servisga obuna narxi qimmatlashmaydi.
Eslatib o‘tamiz, 2021-yilning martida Netflix mobil dasturida qisqa kulgili videolarga ega TikTok muqobili ishga tushirilgandi. Bo‘lim “Darrov kulgi” (Fast Laughs) nomini olgan. TikTok’dan farqli o‘laroq, foydalanuvchilar u yerga o‘zlarining shaxsiy roliklarini yuklay olmaydi — lenta faqat Netflix kontentini ko‘rsatadi.
Izoh (0)