Hozirda Kanadada o‘rmonlarning yo‘q bo‘lib ketish muammosi dolzarbligicha qolmoqda, hatto mamlakatni shimoliy yarimshar Braziliyasi deb ham atashadi. Shu sabab bu yerda texnologiya yordamida o‘rmonlarni tiklash g‘oyasining paydo bo‘lishi ajablanarli hol emas.
Flash Forest kompaniyasi tomonidan daraxt ekish uchun maxsus dron yaratildi. Bugungi kunda kompaniya butun boshli uchuvchisiz qurilmalarga ega: ularning ba’zilari daraxt eksa, boshqalari ularni sug‘orish va parvarishlash bilan shug‘ullanadi.
Kompaniya salkam ikki yil oldin tashkil etilgan. Ular dastlab dronlarni sinovdan o‘tkazib, qo‘nish texnikasini ishlab chiqishdi. Natija esa hayratlanarli — o‘tgan ikki oy ichida 20 kishidan iborat jamoa dronlar yordamida butun Kanada bo‘ylab 300 ming tup ko‘chat ekishga muvaffaq bo‘ldi.
Urug‘larni ekish sxemasi eng kichik detallarga qadar takomillashtirilgan va ajablanarlisi shundaki, u amalda inson ishtirokisiz, ammo samarali ishlaydi. Dastlab belgilangan hudud skanerlaydigan va qo‘nish uchun qulay joylarni aniqlaydigan dron yordamida o‘rganiladi. Keyin pnevmatik otish moslamasi bilan jihozlangan “ekuvchi dronlar” yuboriladi. Ular aniq hisoblangan kuch bilan har bir urug‘ni optimal chuqurlikka qadar otadi.
Qurilmaga nafaqat urug‘, balki yosh o‘simlikning ildiz olishiga yordam beradigan ozuqaviy qo‘shimchalar ham yuklanadi. Urug‘ ekib bo‘lingach, boshqa dronlar tuproqqa qo‘shimcha ozuqalarni sepib chiqadi. Jarayon shu bilan tugamaydi: dronlar ko‘chatlarning o‘sishini kuzatib boradi va barcha ma’lumotlarni kompyuterlarga uzatadi.
Takomillashtirilgan tizim yordamida Flash Forest dronlari bir kunda 10 mingga yaqin daraxt urug‘larini ekishga qodir. Dronlar yordamida ekish qo‘lda ishlashga qaraganda ancha qulay, tezroq va arzonroq.
Hozirda biologik xilma-xillikni saqlab qolish uchun turli xil daraxtlar bilan tajriba o‘tkazilmoqda va o‘rmonlarni qayta tiklashning ushbu usuli Kanadadan boshqa mamlakatlarda ham qiziqish uyg‘otishiga umid qilinmoqda.
Mavzuga doir:
Izoh (0)