Qisqa videolarni almashishga mo‘ljallangan TikTok ijtimoiy tarmog‘i foydalanuvchilarga ishga qabul qilinishda videorezyumeni yuklash imkonini beradigan dasturni ishga tushirdi. Pilot loyiha hozircha faqat AQShda ishlamoqda, deb xabar beradi IXBT.
7–31-iyul kunlari “TikTok rezyume” dasturi doirasida Chipotle Mexican Grill restoranlar tarmog‘i, Taget ulgurji savdo tarmog‘i, WWE Superstar teledasturi, Shopify internet-kompaniyasi, TikTok servisining o‘zi va boshqa ko‘plab kompaniyalar bo‘sh ish o‘rinlari uchun video shaklidagi arizalarni qabul qiladi. Buning uchun #TikTokResumes xeshtegidan foydalanish kerak.
TikTok ushbu dasturning ishga tushirilishini karyera va ishga bog‘liq ijodiy kontent soni ko‘paygani bilan bog‘lamoqda. Ta’kidlanishicha, “TikTok’ning oddiy funksiyalaridan foydalangan holda qisqa kreativ videoroliklarni yaratish iste’dodli nomzodlar va karyera imkoniyatlarni qidirishga ko‘maklashadi”.
Eslatib o‘tamiz, 2-iyuldan O‘zbekiston qonuniga zid ravishda faoliyat yuritayotgan ayrim ijtimoiy tarmoqlardan foydalanish mamlakat hududida cheklandi, xususan, ular orasida TikTok ijtimoiy tarmog‘i ham bor.
Izoh (0)