Mustaqil Davlatlar Hamdo‘stligi (MDH) davlatlarida COVID-19’ga qarshi emlanganlik to‘g‘risidagi sertifikatlarni o‘zaro tan olish masalasi muhokama qilindi. Bu haqda Hamdo‘stlik ijroiya qo‘mitasi veb-saytiga tayanib, “Interfaks” xabar berdi.
Xabarga ko‘ra, 15-iyul kuni MDH davlatlari vakillarining uchrashuvi bo‘lib o‘tdi.
“Uchrashuv ishtirokchilarining ta’kidlashlaricha, hozirgi kunda Hamdo‘stlikning barcha mamlakatlarida fuqarolarni COVID-19’ga qarshi faol emlash ishlari olib borilmoqda, ularga milliy sertifikat va vaksinatsiyani tasdiqlovchi QR-kod beriladi. Uchrashuv ishtirokchilarining fikriga ko‘ra, emlash sertifikatlarining o‘zaro tan olinishi koronavirusga qarshi emlangan fuqarolarning transchegaraviy harakatlanishini osonlashtiradi, sayyohlik oqimlarini tiklaydi hamda oilaviy va xizmat safarlarini davom ettiradi”, — deyiladi xabarda.
Unda ta’kidlanishicha, tomonlar ushbu masalani batafsil o‘rganishni davom ettirishga qaror qilgan.
“Bundan tashqari, Hamdo‘stlik mamlakatlari vakillari MDH sog‘liqni saqlash sohasidagi hamkorlik kengashi doirasida aholining sanitariya-epidemiologik farovonligi sohasida vakolatli organlar rahbarlari kengashini tuzish masalasini muhokama qilishga qaror qildi”, — ta’kidlaydi ijroiya qo‘mitasi.
Belarus Sog‘liqni saqlash vazirligi tashabbusi bilan o‘tkazilgan yig‘ilishda O‘zbekiston, Armaniston, Belarus, Qozog‘iston, Qirg‘iziston, Moldova, Rossiya, Tojikiston, Turkmaniston, va Yevrosiyo iqtisodiy komissiyasining manfaatdor vazirlik va idoralari vakillari ishtirok etgan.
Mavzuga doir:
- JSST hozircha “vaksina pasportlari”ni joriy etishni tavsiya qilmaydi
- Yevropa Ittifoqida tasdiqlangan vaksinalar bilan emlangan chet ellik sayyohlar uchun Ittifoq chegaralarini ochish taklif qilindi
- O‘zbekistonda to‘liq emlash kursini tamomlagan fuqarolarga QR-kodli sertifikat beriladi
- Yevropa Ittifoqida 15-iyundan vaksinatsiya pasportlari joriy qilinadi
Izoh (0)