МДҲ мамлакатлари бир-бирларининг COVID-сертификатларини тан олишни бошлаши мумкин

Мустақил Давлатлар Ҳамдўстлиги (МДҲ) давлатларида COVID-19’га қарши эмланганлик тўғрисидаги сертификатларни ўзаро тан олиш масаласи муҳокама қилинди. Бу ҳақда Ҳамдўстлик ижроия қўмитаси веб-сайтига таяниб, «Интерфакс» хабар берди.

Хабарга кўра, 15 июль куни МДҲ давлатлари вакилларининг учрашуви бўлиб ўтди.

«Учрашув иштирокчиларининг таъкидлашларича, ҳозирги кунда Ҳамдўстликнинг барча мамлакатларида фуқароларни COVID-19’га қарши фаол эмлаш ишлари олиб борилмоқда, уларга миллий сертификат ва вакцинацияни тасдиқловчи QR-код берилади. Учрашув иштирокчиларининг фикрига кўра, эмлаш сертификатларининг ўзаро тан олиниши коронавирусга қарши эмланган фуқароларнинг трансчегаравий ҳаракатланишини осонлаштиради, сайёҳлик оқимларини тиклайди ҳамда оилавий ва хизмат сафарларини давом эттиради», — дейилади хабарда.

Унда таъкидланишича, томонлар ушбу масалани батафсил ўрганишни давом эттиришга қарор қилган.

«Бундан ташқари, Ҳамдўстлик мамлакатлари вакиллари МДҲ соғлиқни сақлаш соҳасидаги ҳамкорлик кенгаши доирасида аҳолининг санитария-эпидемиологик фаровонлиги соҳасида ваколатли органлар раҳбарлари кенгашини тузиш масаласини муҳокама қилишга қарор қилди», — таъкидлайди ижроия қўмитаси.

Беларусь Соғлиқни сақлаш вазирлиги ташаббуси билан ўтказилган йиғилишда Ўзбекистон, Арманистон, Беларусь, Қозоғистон, Қирғизистон, Молдова, Россия, Тожикистон, Туркманистон, ва Евросиё иқтисодий комиссиясининг манфаатдор вазирлик ва идоралари вакиллари иштирок этган.