Germaniya va Belgiyada kuzatilgan suv toshqinlari oqibatida halok bo‘lganlar soni qariyb 50 nafarga yetdi. Bu haqda France-24 xabar berdi.
Agentlik 15-iyul kuni Germaniyada 42 nafar odamning talafot oqibatida halok bo‘lgani tasdiqlangani, taxminan, 70 nafar fuqaro turli darajadagi jarohatlar olganini ma’lum qilgan. Mamlakatda 50 nafardan 70 nafargacha odam tabiiy ofatdan keyin bedarak yo‘qolgan.
Suv toshqini oqibatida halok bo‘lgan insonlarning jasadlari federal yerlar Shimoliy Reyn-Vestfaliya va Reynald-Pfalts aholi yashash maskanlaridan topilgan.
Qutqaruv ishlariga favqulodda vaziyatlar xizmatlari xodimlaridan tashqari harbiy xizmatchilar ham jalb qilingan.
Belgiyada toshqin tufayli kamida olti nafar odam qurbon bo‘lgan.
Dastlab to‘rt nafar odamning murdasi Vervye shahridan, keyinroq yana ikki kishining jasadi ham mazkur hudud yaqinidan topilgan.
Lyej hamda Namyur provinsiyalarida yo‘llar, binolarning pastki qavatlari suv ostida qolib ketgan, suv oqimi mashinalarni ham oqizib ketgan.
Belgiya poytaxti ham suv balosi asoratlaridan aziyat chekkan, toshqin sabab u yerda ham bir nechta avtomobil tunnellari yopib qo‘yilgan.
Eslatib o‘tamiz, 2021-yil 15-iyul kuni Germaniyaga kuchli sel hamda Bernd sikloni yopirilgan.
Izoh (0)