Buyuk Britaniyaning The Guardian nashri 2016-yil boshida Rossiya prezidenti Vladimir Putin Donald Trampni AQShdagi prezidentlik saylovlarida qo‘llab-quvvatlash maqsadida maxsus josuslik operatsiyalarini o‘tkazish haqida ko‘rsatmalar berganini xabar qildi. Nashr bu haqda Kremldagi axborot sizdirilishi oqibatida oshkor bo‘lgan hujjatlar orqali xabar topgan.
Britaniya gazetasining qayd etishicha, 2016-yil 22-yanvar kuni Kremlda Rossiya xavfsizlik kengashining mazkur masala muhokamasiga bag‘ishlangan muhim yig‘ilishi o‘tkazilgan. Unda Putin, yuqori lavozimdagi vazirlar, Rossiya maxsus xizmatlarining rahbarlari ishtirok etgan. Rasmiy ma’lumotlarga ko‘ra, shu kuni haqiqatdan ham Xavfsizlik kengashining majlisi o‘tkazilgan, ammo tadbirda mamlakat ichidagi masalalar, Moldova hamda dunyo bozoridagi vaziyat muhokama qilingan.
Yig‘ilish ishtirokchilari Rossiya prezidenti boshqaruvidagi ekspertlar boshqarmasining Moskvaga qarshi AQSh sanksiyalariga javob harakatlari bo‘yicha hisobotini o‘rgangan. Hujjatda Donald Tramp AQSh prezidentligi uchun asosiy va nisbatan munosib nomzod deb yozilgan, barcha kuchlarni safarbar etib, uni saylovlarda qo‘llab-quvvatlash, saylovlarda g‘alaba qozonishi uchun harakat qilish zarurligi ta’kidlangan. Shuningdek, mazkur harakatlar AQShda ijtimoiy beqarorlikni yuzaga keltirish hamda mazkur mamlakat prezidentining muzokaralardagi pozitsiyasini kamaytirish uchun amalga oshirilishi nihoyatda muhim ekani qayd etilgan.
Hisobot mualliflari Trampga “psixik jihatdan beqaror, ixtiyorsiz, past darajadagi kompleksga ega muvozanatdan tez chiquvchi, amalda konservativ qarashlar bilan cheklanadigan shaxs” deya tavsif bergan.
The Guardian sizdirilgan hujjat Kremlda Tramp haqida boshqa shaxsiy ma’lumotlar bo‘lganligini tasdiqlashi haqida yozgan. Hisobotda Tramp Rossiyada bo‘lgan vaqtlaridagi aytim vaziyatlar qalamga olingan. Gap qaysi hodisalar haqida ketayotgani mavhum, tafsilotlar hisobotga ilova qilingan, biroq jurnalistlar bu boradagi ma’lumotlarni qo‘lga kirita olmagan.
The Guardian o‘sha vaqtda Vladimir Putin hamda razvedka idoralarining boshqa rahbarlari yig‘ilish yakunida AQSh prezidentligi saylovlariga aralashish rejasini tayyorlab qo‘ygan deb hisoblamoqda. Nashr ushbu uchrashuvdan keyin Rossiya prezidenti AQShga qarshi javob harakatlarini amalga oshiradigan komissiya tuzish haqida farmonni imzolaganini taxmin qilgan. Qayd etilishicha, G‘arb maxsus xizmatlari mazkur hujjatlardan xabardor bo‘lgan va ularni diqqat bilan o‘rganib chiqqan.
Nashr mamlakat harbiy razvedkasi uchun javobgar — Rossiya mudofaa vaziri Sergey Shoyguning komissiya raisi bo‘lganini aniqlagan. Shoyguga bo‘linma va xizmatlar ishini muvofiqlashtirish, axborotni to‘plash hamda tizimlashtirish, shuningdek, obyektning axborot muhitiga ta’sir ko‘rsatish tadbirlarini (kiberhujumlar ekani taxmin qilingan) tayyorlash bo‘yicha topshiriqlar berilgan. Tashqi razvedka xizmati komissiya uchun qo‘shimcha axborot to‘plashi, Federal xavfsizlik xizmati esa kontrrazvedka ishlari bilan shug‘ullanishi belgilangan. Idoralarga bir hafta ichida, 2016-yil 1-fevralgacha saylovlar jarayoniga aralashish yuzasidan aniq takliflar berish vazifasi yuklangan.
Rossiya prezidenti matbuot kotibi Dmitriy Peskov The Guardian e’lon qilgan mazkur materialga izoh berar ekan ushbu maqolaga “ajoyib jinoiy asar” deb ta’rif berdi. Jurnalistlar bu borada Donald Trampning rasmiy izohini olishning uddasidan chiqmagan.
Avval AQSh hukumati Rossiyaning 2016-yildagi saylovlarga aralashganligi bo‘yicha tergov ishlarini olib borgan. Ishni o‘rgangan maxsus prokuror Robert Myuller Rossiyaning saylovlar jarayoniga aralashgan, lekin Donald Tramp va uning shtabi bilan kelishgan holda ish olib bormagan degan xulosaga kelgan. Rossiya vakillari saylovlarga aralashuv bo‘lganini inkor qilib kelmoqda.
Izoh (0)