Jizzax viloyatida o‘zgalar tomonidan tashkil etilgan xayriya e’loni ostiga o‘z plastik kartasi raqamini joylashtirish orqali 11 million so‘m “ishlab olgan” yigitga nisbatan jinoyat ishi qo‘zg‘atildi. Bu haqda Navoiy viloyati IIB axborot xizmati xabar berdi.
Ma’lum qilinishicha, Navoiy viloyatida yashovchi fuqaro R.G. o‘zining 3 yoshli jiyani X.I. og‘ir darajada kuygani sabab 2021-yil 14-aprel kuni Telegram’da moddiy yordam guruhini ochib, unga jiyanining kuygan holdagi videolavhalarni, o‘zining telefoni va bank plastik karta raqamini joylashtirgan.
Ammo 27-aprel kuni noma’lum shaxs tomonidan ushbu videolavhalarni Telegram’dan ko‘chirib olib, unda yozilgan plastik karta va telefon raqamlarni o‘zinikiga o‘zgartirgan holda xalqdan yordam so‘rab, bir qator guruhlarda joylashtirgan va soxta xayriya e’lonlarini bergan.
Surishtiruvga ko‘ra, mazkur harakatni Jizzax viloyati Paxtakor tumanida yashovchi 2002-yilda tug‘ilgan M.R. sodir etgani aniqlanib, bir dona bank plastik kartasi va telefon ashyoviy dalil tariqasida hujjatlashtirib olingan.
Aniqlanishicha, M.R. ushbu soxta xayriya e’loni orqali plastik kartasiga jami bo‘lib 11 million so‘mga yaqin pul mablag‘larini tushirib, pullarni o‘zining ehtiyoji uchun ishlatib yuborgan.
Holat yuzasidan fuqaro M.R.ga nisbatan Jinoyat kodeksining 168-moddasi (firibgarlik) 2-qismi “v” bandi bilan jinoyat ishi qo‘zg‘atilib, dastlabki tergov harakatlari olib borilmoqda.
Avvalroq Toshkentda masjid qurilishiga ehson qilish bahonasida qariyb 34 mln so‘m pulni o‘zlashtirgan firibgar qo‘lga olingani, Buxoroda nogiron fuqaro uchun ehson yig‘ish bahonasida salkam 9 mln so‘m pulni o‘zlashtirgan firibgarga jinoyat ishi qo‘zg‘atilgani to‘g‘risida xabar berilgandi.
Izoh (0)