Жиззах вилоятида ўзгалар томонидан ташкил этилган хайрия эълони остига ўз пластик картаси рақамини жойлаштириш орқали 11 миллион сўм «ишлаб олган» йигитга нисбатан жиноят иши қўзғатилди. Бу ҳақда Навоий вилояти ИИБ ахборот хизмати хабар берди.
Маълум қилинишича, Навоий вилоятида яшовчи фуқаро Р.Г. ўзининг 3 ёшли жияни Х.И. оғир даражада куйгани сабаб 2021 йил 14 апрель куни Telegram’да моддий ёрдам гуруҳини очиб, унга жиянининг куйган ҳолдаги видеолавҳаларни, ўзининг телефони ва банк пластик карта рақамини жойлаштирган.
Аммо 27 апрель куни номаълум шахс томонидан ушбу видеолавҳаларни Telegram’дан кўчириб олиб, унда ёзилган пластик карта ва телефон рақамларни ўзиникига ўзгартирган ҳолда халқдан ёрдам сўраб, бир қатор гуруҳларда жойлаштирган ва сохта хайрия эълонларини берган.
Суриштирувга кўра, мазкур ҳаракатни Жиззах вилояти Пахтакор туманида яшовчи 2002 йилда туғилган М.Р. содир этгани аниқланиб, бир дона банк пластик картаси ва телефон ашёвий далил тариқасида ҳужжатлаштириб олинган.
Аниқланишича, М.Р. ушбу сохта хайрия эълони орқали пластик картасига жами бўлиб 11 миллион сўмга яқин пул маблағларини тушириб, пулларни ўзининг эҳтиёжи учун ишлатиб юборган.
Ҳолат юзасидан фуқаро М.Р.га нисбатан Жиноят кодексининг 168-моддаси (фирибгарлик) 2-қисми «в» банди билан жиноят иши қўзғатилиб, дастлабки тергов ҳаракатлари олиб борилмоқда.
Аввалроқ Тошкентда масжид қурилишига эҳсон қилиш баҳонасида қарийб 34 млн сўм пулни ўзлаштирган фирибгар қўлга олингани, Бухорода ногирон фуқаро учун эҳсон йиғиш баҳонасида салкам 9 млн сўм пулни ўзлаштирган фирибгарга жиноят иши қўзғатилгани тўғрисида хабар берилганди.
Изоҳ (0)