Buxoro viloyati Buxoro tumanida hokimlik zaxirasidagi yerni o‘zgaga sotib yubormoqchi bo‘lgan shaxs qo‘lga olindi, deya xabar qilmoqda viloyat IIB.
Huquqni muhofaza qiluvchi idora xodimlari tomonidan tezkor tadbir o‘tkazilgan. Unda aniqlanishicha, fuqaro B.A. o‘zga bir fuqaroni aldab, uning ishonchini suiiste’mol qilib, Buxoro tumani “Rabotiqalmoq” mahallasi hududidagi tuman hokimligi zaxirasida turgan 20 sotix yer maydonini 8 000 AQSH dollariga sotishga kelishadi.
Fuqaro B.A. Buxoro shahar B.Naqshband ko‘chasida joylashgan Respublika shoshilinch tibbiy yordam markazi Buxoro filiali binosi oldida kimyoviy ishlov berilgan pullarni olgan vaqtida ashyoviy dalillar bilan ushlangan.
Mazkur holat yuzasidan B.A.ga nisbatan Jinoyat kodeksining 168-moddasi 3-qismi “v” bandi (xizmat mavqeyidan foydalanib sodir etilgan firibgarlik) bilan jinoyat ishi qo‘zg‘atilib, dastlabki tergov harakatlari olib borilmoqda.
Bundan avval Farg‘onada 50 sotix yerni 25 ming dollarga noqonuniy sotmoqchi bo‘lgan MChJ boshlig‘i ushlangani, Buxoroda 600 dollar evaziga soxta hujjat tayyorlab bergan kadastr xodimi qo‘lga olingani hamda Yangiyo‘lda 9 ming dollar evaziga fermer xo‘jaligining 6 sotix yerini olib berishni va’da qilgan shaxs ushlangani haqida xabar berilgandi.
Izoh (0)