“Andijon muzqaymog‘i”ni besh yildan buyon ishlab chiqarish bilan shug‘ullanib kelayotgan tadbirkor Hikmatillo Madrahimov boshqa yangi brend ostida ishlashga qaror qildi, deb xabar beradi Spot.
Adliya vazirligi huzuridagi Intellektual mulk agentligining ma’lum qilishicha, Madrahimov “Anjan muzqaymog‘i” tovar belgisini ro‘yxatdan o‘tkazgan bo‘lib, endilikda u o‘z kompaniyasida ushbu nomdan foydalanadi.
Ta’kidlanishicha, “Andijon muzqaymog‘i” respublikaning barcha hududlariga yetib borgan va o‘zining noodatiy ta’mi bilan xaridorlarning ishonchi hamda mehriga sazovor bo‘lgan. Ammo shu kunlarda ko‘p joylarda “Andijon muzqaymog‘i”ning sifatiga mos kelmagan kontrafakt mahsulot turlari ko‘payib, ko‘chalarda go‘yoki samolyot orqali Andijondan olib kelingan degan yolg‘on ma’lumot bilan sotilayotgani uchramoqda.
Avvalroq tadbirkor muzqaymoq ishlab chiqarish sohasida 15 yildan buyon faoliyat yuritayotgani, besh yil oldin “Andijon muzqaymog‘i”ni chiqarishni boshlganini so‘zlab bergandi. Mazkur nom ommalashgach, bundan foydalanishga qaror qilgan ko‘plab insonlar paydo bo‘lgan.
Ushbu nom ostida sotilayotgan muzqaymoqlar sanitariya talablariga rioya qilmayotgani aniqlangach, Madrahimov ishlab chiqarishni to‘xtatgan. Xaridorlar haqiqiy va soxta muzqaymoqni ajratib olishi uchun tadbirkor nafaqat tovar belgisini, balki furgonini ham ro‘yxatdan o‘tkazgan.
Izoh (0)