Toshkentdagi xalqaro konferensiya dasturi doirasida O‘zbekiston Prezidenti Shavkat Mirziyoyev Turkmaniston Vazirlar Mahkamasi raisining o‘rinbosari, tashqi ishlar vaziri Rashid Meredovni qabul qildi, deb xabar bermoqda Prezident matbuot xizmati.
Xabarda aytilishicha, oliy darajadagi muntazam muloqotlar tufayli ko‘p qirrali O‘zbekiston—Turkmaniston yaxshi qo‘shnichilik va strategik sheriklik munosabatlari izchil mustahkamlanib borayotgani alohida ta’kidlandi.
Rashid Meredov davlat rahbariga Turkmaniston prezidenti Gurbanguli Berdimuhamedovning salomi va samimiy tilaklarini yetkazdi. O‘zbekiston yetakchisining Markaziy va Janubiy Osiyo bog‘liqligini rivojlantirish borasidagi tashabbuslari yuksak baholandi.
Ikki mamlakat o‘rtasidagi amaliy hamkorlikni yanada kengaytirish masalalari ko‘rib chiqildi. Qo‘shma hukumatlararo komissiyaning navbatdagi yig‘ilishini o‘tkazish muhimligi qayd etildi.
Shuningdek, 2021-yilning 6-avgust kuni “Avaza” milliy turizm zonasida o‘tkaziladigan Markaziy Osiyo mamlakatlari davlat rahbarlarining Maslahat uchrashuviga tayyorgarlikning borishi muhokama qilindi.
Afg‘onistonda qaror topayotgan murakkab vaziyat yuzasidan fikr almashildi.
Bundan avval Shavkat Mirziyoyev ushbu xalqaro konferensiya doirasida Xitoy tashqi ishlar vaziri Van I ni, Rossiya tashqi ishlar vaziri Sergey Lavrovni, Hindiston tashqi ishlar vaziri Subramanyam Jayshankarni, Qozog‘iston bosh vaziri o‘rinbosari — tashqi ishlar vaziri Muxtor Tleuberdini qabul qilgandi.
Davlat rahbari, shuningdek, Afg‘oniston hamda Pokiston prezidenti bilan uchrashdi, Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrelni qabul qildi.
Eslatib o‘tamiz, Toshkent shahrida 16-iyul kuni “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusida xalqaro konferensiya o‘z ishini boshladi. Shavkat Mirziyoyev tashabbusi bilan tashkil etilgan anjumanda Afg‘oniston prezidenti, Pokiston bosh vaziri, Markaziy va Janubiy Osiyo davlatlarining tashqi ishlar vazirlari, jami 44 ta mamlakat va 30 ga yaqin xalqaro tashkilot delegatsiyalari, nufuzli xorijiy ilmiy-tadqiqot va tahlil markazlari rahbarlari ishtirok etmoqda.
Izoh (0)