O‘zbekiston xalq o‘qituvchisi, “Qorako‘l maktabi” asoschisi To‘xtamurod Jumayev 14-iyul kuni 76 yoshida vafot etgani haqida xabar berilgan edi. 15-iyul kuni uning dafn marosimi bo‘lib o‘tdi.
Ushbu maktabda o‘qigan Ozod Ro‘ziyevning “Daryo”ga ma’lum qilishicha, To‘xtamurod Jumayev Qorako‘l tumanidagi “Hazrat Mastoli” qabristoniga dafn qilindi.
Marhumni qabristonga olib ketish vaqtida “Qorako‘l maktabi”da o‘qigan o‘quvchilar yo‘lda qator tizilib, ustozlariga hurmat bajo keltirdi.
U tashkil qilgan “Qorako‘l maktabi”da o‘ziga xos ta’lim olish tizimi joriy qilingan. Prezident Shavkat Mirziyoyev 2020-yil sentabr oyida O‘qituvchi va murabbiylar kuniga bag‘ishlangan marosimdagi nutqida To‘xtamurod Jumayevning xizmatlarini e’tirof etgandi.
“Bu ajoyib pedagog o‘zining tinimsiz izlanishi, yangi ta’lim metodikasi bilan oddiy bir qishloq maktabini respublika darajasidagi mashhur ta’lim dargohiga aylantirdi. Holbuki, ushbu maktab Buxoroning olis cho‘l tumanida joylashgan bo‘lib, zamonaviy sharoitga, qulay imkoniyatlarga ham ega emas edi.
To‘xtamurod domla ham jadid bobolarimiz kabi tinimsiz va fidokorona mehnat qilib, hozirgi davrning yangi usul maktabini yaratishga erishdi. Mana, bugungi kunimizning haqiqiy ma’rifatparvari, davrimizning Avloniysi, Behbudiy domlasi, Munavvarqorisi”, — degan edi Prezident.
“O‘zbekiston Respublikasi xalq o‘qituvchisi”, “El-yurt hurmati” ordeni va “Buyuk xizmatlari uchun” ordeni sohibi To‘xtamurod Jumayev murabbiy-metodist sifatida “O‘quvchilar bilimidagi bo‘shliqlarni aniqlash va ularni bartaraf etish usullari”, “Zamonaviy darsni tashkil etish yo‘llari”, “Maktabda ichki nazoratni tashkil qilish” singari 7 ta metodik qo‘llanmasi chop ettirgan.
To‘xtamurod Jumayevning vafoti munosabati bilan Xalq ta’limi vazirligi va O‘zbekiston Prezidenti administratsiyasi uning yaqinlariga va oila a’zolariga chuqur hamdardlik bildirdi.
Izoh (0)