Toshkentda Markaziy Osiyo xalqaro institutining tantanali ochilish marosimi bo‘lib o‘tdi

Toshkentda 15-iyul kuni Markaziy Osiyo xalqaro institutining tantanali ochilish marosimi bo‘lib o‘tdi, deb xabar bermoqda TIV matbuot xizmati.

Qayd etilishicha, tadbir avvalida Oliy Majlis Senati raisi Tanzila Norboyeva Prezident Shavkat Mirziyoyevning tabrigini o‘qib eshittirdi.

Marosimda “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” xalqaro konferensiya doirasida Toshkent shahriga kelgan Markaziy Osiyo mamlakatlari tashqi siyosat idoralari rahbarlari, BMT, MDH, Shanxay hamkorlik tashkiloti, Turkiy tilli davlatlar hamkorlik kengashi, Osiyoda hamkorlik va ishonch choralari bo‘yicha kengashning yuqori vakillari ishtirok etdi.

O‘zbekiston tashqi ishlar vaziri Abdulaziz Komilov o‘z nutqida mazkur institutning ochilishi mintaqaviy va iqtisodiy jarayonlarning ahamiyati tobora ortib borayotganidan dalolat berishini qayd etdi.

“Ayniqsa, bunday jarayonlar so‘nggi yillarda Markaziy Osiyoda jadal kechmoqda. Vazir yangi muassasa mintaqaviy hamkorlik istiqbollarini ekspertlar darajasida batafsil muhokama qilish, turli sohalardagi ko‘p tomonlama loyihalar bo‘yicha amaliy va ilmiy asoslangan takliflarni ishlab chiqish uchun imkoniyat yaratishiga ishonch bildirdi”, — deyiladi TIV xabarida.

Eslatib o‘tamiz, O‘zbekistonda Markaziy Osiyo xalqaro institutini tashkil etish to‘g‘risidagi qaror Prezident Shavkat Mirziyoyev tomonidan 2020-yilning avgust oyida imzolangan. Ushbu institut mintaqa davlatlari rahbarlari Maslahat uchrashuvining Toshkentda bo‘lib o‘tgan ikkinchi sammitida erishilgan barcha kelishuvlarni to‘liq amalga oshirish, ekspert-tahlil doira vakillari, amaliyotchi mutaxassislar o‘rtasidagi aloqalarni kengaytirish, mintaqaviy strategiyani ishlab chiqishda ular ishtirokini ta’minlash maqsadida tashkil etilgan.

Ushbu institut direktori etib Prezident administratsiyasi sho‘basi mudiri Anvar Nosirov tayinlangan.