Toshkentda 15-iyul kuni “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi yuqori darajali xalqaro konferensiya doirasida “Markaziy Osiyo mamlakatlari — AQSh” (S5+1) formatidagi navbatdagi yig‘ilish bo‘lib o‘tdi. TIV rasmiy vakilining xabar berishicha, uchrashuvda “S5+1” shakli doirasidagi hamkorlikning dolzarb jihatlari muhokama qilindi, xalqaro siyosat va mintaqaviy xavfsizlikni ta’minlash masalalari borasida fikr almashildi.
“Gazeta.uz”ning yozishicha, yig‘ilishda ishtirok etgan AQSh prezidentining ichki xavfsizlik masalalari bo‘yicha maslahatchisi Elizabet Shervud-Rendall forumida AQSh yakka yoki ikki tomonlama emas, hamkorlikda ko‘proq ish qilishi mumkinligini ta’kidladi.
“S5+1 forumida biz yakka yoki ikki tomonlama emas, hamkorlikda ko‘proq ish qilishimiz mumkin. Ushbu yondashuv prezident (Jo) Baydenning e’tibori markazida. Bugun biz duch kelayotgan — COVID-19 pandemiyasidan tortib iqlim o‘zgarishigacha va xalqaro terrorizm bo‘yicha muammolar — bitta mamlakatning o‘zi hal qila olishi uchun juda qiyin”, — degan Elizabet Shervud-Rendall.
Amerika prezidentining maslahatchisi avgust oyining oxirida AQShning Afg‘onistondagi harbiy missiyasi 20 yildan so‘ng yakunlanishini eslatdi. “Biz munosabatlarning yangi bosqichiga o‘tamiz. Prezident Bayden aytganidek, bizning askarlarimiz uyga qaytayotganlarida Afg‘oniston hukumati va afg‘on xalqiga bo‘lgan sadoqatimiz saqlanib qolmoqda”, — deya qo‘shimcha qilgan u.
“Biz Afg‘oniston milliy mudofaa kuchlariga xavfsizlik, shuningdek, rivojlanish va gumanitar yordam ko‘rsatishda davom etamiz. Biz Qo‘shma Shtatlarga va ittifoqchilarimiz hamda sheriklarimiz xavfsizligiga, shu jumladan, sizlarning mamlakatlaringizga tahdid soluvchi terroristik guruhlarga qarshi agressiv harakatlarimizni davom ettiramiz”, — ta’kidlagan Elizabet Shervud-Rendall.
“Shuningdek, biz afg‘on xalqiga munosib tinchlik olib keladigan va Afg‘oniston kelajagini qo‘llab-quvvatlash uchun yanada kuchli mintaqaviy va xalqaro bazani yaratadigan siyosiy yechimga erishish uchun muzokaralarni qo‘llab-quvvatlashni davom ettiramiz. Bu Afg‘oniston xalqi va jamoaviy xavfsizligimiz uchun birgalikda qilishimiz kerak bo‘lgan ishdir”, — degan u.
Bundan tashqari, AQSh prezidenti maslahatchisining so‘zlariga ko‘ra, hozirda mamlakat vaksinalarning dunyo bo‘ylab tarqalishini tezlashtirish uchun agressiv kampaniyani amalga oshirmoqda. “Biz COVAX dasturiga 500 million dozani va’da qildik va vaksina ushbu mintaqaga ham yetib keladi”, — deya qo‘shimcha qilgan u.
Eslatib o‘tamiz, 15-iyul kuni “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiya boshlanadi. Unda 400 dan ortiq xorijiy mehmonlar ishtirok etishi kutilmoqda. Prezident Shavkat Mirziyoyev tashabbusi bilan o‘tkazilayotgan konferensiya Markaziy va Janubiy Osiyo davlatlari o‘rtasidagi do‘stona aloqalar, ishonch va yaxshi qo‘shnichilik munosabatlarini mustahkamlashga qaratilgan.
Izoh (0)