Toshkentning markaziy ko‘chalarida 15-iyul kuni ertalabdan boshlab vaqti-vaqti bilan transport harakati cheklanmoqda, deb yozmoqda “Gazeta.uz”. Bu “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiya ishtirokchilari, delegatsiyalar kelishi bilan bog‘liq bo‘lib, asosiy tadbirlar 16-iyulga rejalashtirilgan.
Forumning yuqori martabali xorijiy ishtirokchilari orasida Afg‘oniston prezidenti, Pokiston bosh vaziri, Markaziy va Janubiy Osiyo mamlakatlari va boshqa davlatlarning tashqi ishlar vazirlari va rasmiylari, xalqaro va mintaqaviy tashkilotlar va moliya institutlari rahbarlari bor.
Toshkent shahar IIBB bir necha kun oldin Tashkent City biznes markazi atrofidagi ko‘chalar avtotransport harakatlanishi uchun yopiq bo‘lishi haqida xabar bergan edi. Biroq hozirda vaqti-vaqti bilan katta tirbandliklar shaharning turli tumanlaridagi boshqa ko‘chalarda ham kuzatilmoqda.
Shuningdek, shahar ustidan vertolyotlar aylanmoqda, bu shahar aholisi uchun noodatiy holat va vaziyatdan xabardor bo‘lmagan fuqarolarda savollar tug‘dirmoqda.
“Toshshahartransxizmat” (TSHTX) matbuot xizmati Tashkent City hududi atrofida avtobuslar harakatlanish yo‘nalishi o‘zgarishi haqida oldinroq tushuntirish bergan edi. Bu 53, 64, 65 va 141-sonli avtobus yo‘nalishlariga tegishli. Lekin yo‘llar yopiqligi bois yo‘lovchilar shaharning boshqa qismlarida ham avtobuslarni uzoq vaqt kutishlariga to‘g‘ri kelmoqda. Bu haqda ular ogohlantirilmagan edi.
TSHTX matbuot xizmatining “Gazeta.uz”ga ma’lum qilishicha, ushbu vaziyat vaqtincha davom etib, ko‘chalardagi harakatlanish uzog‘i bilan 10 daqiqaga cheklanmoqda, shu sababli avtobuslarning (yuqorida keltirilganlaridan tashqari) yo‘nalishiga o‘zgartirishlar kiritilmagan.
Xabarda ta’kidlanishicha, Toshkent rasmiylari ma’lum yo‘llarning yopilishi haqida ogohlantirib borsa ham, yuqorida keltirilgan kutilmagan yo‘llar yopilishini oldindan bashorat qilish qiyin. Avtobus haydovchilari “Gazeta.uz”ga yo‘ldagi vaziyat o‘zgarishi haqida ko‘pincha ma’lumotga ega bo‘lmasliklarini va yo‘nalishni o‘zgartirish bo‘yicha o‘zaro kelishib olishga majbur bo‘lishlarini bildirgan.
“Gazeta.uz” haydovchilarga navigator ilovalari bilan yo‘lni tekshirishni, jamoat transporti yo‘lovchilariga esa ular yo‘lda rejalaridan ko‘proq vaqt ketkazishlari mumkinligini inobatga olishlarini tavsiya etmoqda.
Izoh (0)