Ўзбекистон халқ ўқитувчиси, «Қоракўл мактаби» асосчиси Тўхтамурод Жумаев 14 июль куни 76 ёшида вафот этгани ҳақида хабар берилган эди. 15 июль куни унинг дафн маросими бўлиб ўтди.
Ушбу мактабда ўқиган Озод Рўзиевнинг «Дарё»га маълум қилишича, Тўхтамурод Жумаев Қоракўл туманидаги «Ҳазрат Мастоли» қабристонига дафн қилинди.
Марҳумни қабристонга олиб кетиш вақтида «Қоракўл мактаби»да ўқиган ўқувчилар йўлда қатор тизилиб, устозларига ҳурмат бажо келтирди.
У ташкил қилган «Қоракўл мактаби»да ўзига хос таълим олиш тизими жорий қилинган. Президент Шавкат Мирзиёев 2020 йил сентябрь ойида Ўқитувчи ва мураббийлар кунига бағишланган маросимдаги нутқида Тўхтамурод Жумаевнинг хизматларини эътироф этганди.
«Бу ажойиб педагог ўзининг тинимсиз изланиши, янги таълим методикаси билан оддий бир қишлоқ мактабини республика даражасидаги машҳур таълим даргоҳига айлантирди. Ҳолбуки, ушбу мактаб Бухоронинг олис чўл туманида жойлашган бўлиб, замонавий шароитга, қулай имкониятларга ҳам эга эмас эди.
Тўхтамурод домла ҳам жадид боболаримиз каби тинимсиз ва фидокорона меҳнат қилиб, ҳозирги даврнинг янги усул мактабини яратишга эришди. Мана, бугунги кунимизнинг ҳақиқий маърифатпарвари, давримизнинг Авлонийси, Беҳбудий домласи, Мунавварқориси», — деган эди Президент.
«Ўзбекистон Республикаси халқ ўқитувчиси», «Эл-юрт ҳурмати» ордени ва «Буюк хизматлари учун» ордени соҳиби Тўхтамурод Жумаев мураббий-методист сифатида «Ўқувчилар билимидаги бўшлиқларни аниқлаш ва уларни бартараф этиш усуллари», «Замонавий дарсни ташкил этиш йўллари», «Мактабда ички назоратни ташкил қилиш» сингари 7 та методик қўлланмаси чоп эттирган.
Тўхтамурод Жумаевнинг вафоти муносабати билан Халқ таълими вазирлиги ва Ўзбекистон Президенти администрацияси унинг яқинларига ва оила аъзоларига чуқур ҳамдардлик билдирди.
Изоҳ (0)