Rossiyaning Veterinariya va fitosanitariya bo‘yicha federal xizmati (“Rosselxoznadzor”) 15-iyuldan boshlab O‘zbekistonning Buxoro viloyatidan Rossiyaga pomidor va qalampir import qilishga vaqtinchalik cheklov o‘rnatdi. Bu haqda “Rosselxoznadzor”ga tayanib UzNews ma’lum qildi.
Cheklovga sabab qilib, Buxorodan yetkazib berilayotgan pomidorlarda “pomidor jigarrang bujmayish virusi” (tomato brown rugouse fruit virus — ToBRFV) aniqlangani ko‘rsatilgan.
15-iyulgacha bo‘lgan vaqtda jo‘natilgan partiyalarga faqatgina fitosanitariya tekshiruvidan o‘tgandan so‘ng Rossiya hududiga olib kirishga ruxsat beriladi.
Eslatib o‘tamiz, jigarrang bujmayish virusi aniqlangani sababli “Rosselxoznadzor” 2020-yil 26-noyabrdan boshlab Farg‘ona viloyatidan Rossiyaga pomidor va qalampir olib kirishni taqiqlagan edi. Keyinroq quritilgan o‘rik partiyasida ham xavfli zararkunanda (kapr qo‘ng‘izi) aniqlangach, “Rosselxoznadzor” Farg‘onadan barcha turdagi o‘simlik mahsulotlari importini taqiqladi. Rossiya tomoni shu kabi taqiqlarni Navoiy va Qashqadaryo viloyatida yetishtirilgan mahsulotlarga ham joriy etgan.
Rossiya 2021-yil aprel oyidagina O‘zbekistondagi 17 ta korxonadan pomidor va qalampir olib kirilishiga ruxsat bergandi.
Izoh (0)