Buxoro viloyatida o‘tkazilgan tadbirda o‘qishga kiritib qo‘yishni va’da qilgan o‘qituvchi va uning sherigi ushlandi, deb xabar beradi Bosh prokuratura huzuridagi departament.
Ma’lum qilinishicha, Bosh prokuratura huzuridagi departamentning Buxoro shahar bo‘limi hamda DXXning Buxoro viloyati boshqarmasi tomonidan tezkor tadbir o‘tkazilgan. Tadbirda fuqaro S.A. Buxoro davlat universiteti o‘qituvchisi B.O‘. bilan oldindan til biriktirib, fuqaro R.ni vakolatli tanishlari orqali ushbu ta’lim muassasasiga o‘qishga kiritib qo‘yishga kelishgani aniqlangan. Ular xizmati evaziga Sh. ismli boshqa bir fuqaro orqali 4 ming dollarni firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoroda talabaning o‘qishini sirtqi bo‘limga ko‘chirib berish uchun 500 dollar so‘ragan dekan o‘rinbosari ushlangani, Buxoroda o‘qishga kiritib qo‘yish uchun ikki fuqarodan 4 ming dollar olgan shaxslar qo‘lga olingani to‘g‘risida xabar berilgandi.
Izoh (0)