Internetda yangi iPhone 12 va 12 Pro smartfonlari, shuningdek, ularning aksessuarlariga oid ma’lumotlar tarqalmoqda. Yangi iPhone’lar ega bo‘lgan muhim jihatlardan biri — smartfon qopqog‘iga o‘rnatilgan magnitlar. Undan bank kartalarini saqlashda yoki MagSafe quvvatlantirish funksiyasini ishlatishda foydalanish mumkin, deb xabar beradi Hi-Tech.Mail.ru.

Foto: Apple Insider

MagSafe magnit quvvatlantirgichi smartfon qopqog‘iga qotiriladi va smartfonni simsiz quvvatlantirishga xizmat qiladi. Ma’lum bo‘lishicha, u nafaqat Qi standarti bo‘yicha ishlaydi, balki ko‘plab Android-smartfonlarga ham mos keladi — masalan, Pixel 5 yoki egiluvchan Samsung Galaxy Z Fold 2’ga. Quvvatlantirish qurilmasi magnitlarda mustahkam joylashib, smartfonni zaryadlaydi.

Foto: Android Police

Faqat simsiz Qi-quvvatlantirish qurilmasini 4 ming rublga (52 dollar) alohida xarid qilishga shoshmaslik kerak. Chunki uning maksimal quvvati 15 vattga teng bo‘lib, u xuddi iPhone’lardagi kabi tez ishlash yoki ishlamasligi noma’lum.

Avvalroq internetda iPhone 12 Pro’ning ilk haqiqiy videosi paydo bo‘lgani to‘g‘risida xabar berilgandi.

Eslatib o‘tamiz, Apple oktabr oyidagi taqdimotida to‘rtta yangi smartfonini namoyish etdi: iPhone 12 Mini, iPhone 12, iPhone 12 Pro va iPhone 12 Pro Max. Barcha gadjetlar kompaniyaning A14 Bionic protsessoriga ega. Ishlab chiqaruvchining ta’kidlashicha, bu hozirgi kunda bozorda mavjud eng kuchli mobil protsessor hisoblanadi.