Qualcomm’ning 1500 dollarlik smartfoni foydalanuvchilar hafsalasini pir qildi — OAV

Snapdragon modemlari va protsessorlarini ishlab chiqaruvchi Qualcomm Asus bilan hamkorlikda kompaniyalarning eng yangi texnologiyalarini o‘zida mujassam etgan yangi smartfonni yaratdi. Smartphone for Snapdragon Insiders nomi ostidagi qurilma 1500 dollarga baholangan, deb xabar beradi “Korrespondent.net”.

Qualcomm gadjet 2021-yil boshlarida tashkil etilgan o‘zining Snapdragon Insider fan-hamjamiyati a’zolariga to‘g‘ridan to‘g‘ri sotishini e’lon qilgan.

Ta’kidlanishicha, smartfonning texnik tavsifi “2021-yilda flagman Android telefonlardan kutish mumkin bo‘lgan standartlarga mos keladi”. U Android 11 operatsion tizimida ishlaydi, tezkor xotirasi 16 gigabayt, ichki xotirasi esa 512 gigabayt, 144 gertsli yangilanish chastotasiga ega 6,78 dyuymli Samsung OLED-ekran va Gorilla Glass Victus o‘rnatilgan.

The Verge nashri yangi qurilmaga Snapdragon 888 protsessori o‘rnatilganiga e’tibor qaratgan, avvalroq kompaniya ancha kuchliroq 888 Plus modelini taqdim etgandi.

“Qimmat narx va Qualcomm’ning eng yaxshi smartfoniga aylanish borasidagi va’dalar hisobga olinadigan bo‘lsa, bu Smartphone for Snapdragon Insiders uchun g‘alati xatolik”, — deyiladi materialda.

Smartfon sig‘imi 4000 mA/soatga teng akkumulyator bilan jihozlangan. Shuningdek, Qualcomm Quick Charge 5 tezkor quvvatlanish texnologiyasi mavjud, biroq u ham to‘liq emas: maksimal quvvati texnologiya nazariy jihatdan qodir bo‘lgan 100 vatt emas, balki 65 vattni tashkil etadi.

Telefonda uchta kamera mavjud: Sony IMX686’ning 64 megapikselli asosiy datchigi, bundan tashqari, soniyasiga 30 ta kadr tezligida 8K sifatli videolarni tasvirga olishga qodir 24 megapikselli frontal kamera. Biroq unda bir vaqtning o‘zida uchta 4K HDR videooqimini suratga olishni boshqarish yoki 28 megapikselli uchta suratni birdaniga olish imkoniyati yo‘q.

Smartfonga qo‘shimcha ravishda Qualcomm naushniklari, Quick Charge 5 quvvatlantirgichi, kabellar jamlanmasi va telefonning rezinali bamperi taqdim etiladi.

“Bularning barchasi hisobga olingan taqdirda ham, qurilma turli bahslarni yuzaga keltiradi — bu kabi yuqori ko‘rsatkichlarni (balki bundan yaxshiroq) arzonroq qiymatda taqdim etishga qodir ko‘plab Android telefonlar mavjud, masalan, OnePlus 9 Pro yoki Galaxy S21 Ultra”, — deya qayd etiladi maqolada.