Tojikiston prezidenti Emomali Rahmon 13-iyul kuni BMT Bosh kotibi Antoniu Guterrish bilan telefon orqali suhbat chog‘ida Afg‘onistondagi vaziyatning keskinlashuvini muhokama qildi. Bu haqda Tojikiston rahbarinining matbuot xizmatiga tayanib, “TASS” xabar berdi.
“Afg‘onistonaro muzokaralar jarayonini amaliy boshlashda har tomonlama yordamning muhim ekani qayd etildi. Shu munosabat bilan ushbu masalada manfaatdor tomonlar o‘rtasida yaqin muvofiqlikni davom ettirish zarurligi ta’kidlandi”, — deyiladi xabarda.
Tojikiston prezidenti, shuningdek, “BMT 2030-yilgacha bo‘lgan davr uchun kun tartibini, uning barqaror rivojlanish maqsadlari va BMT Bosh assambleyasining boshqa rezolyusiyalarini izchil amalga oshirish, ularga munosib va muvaffaqiyatli javob berish uchun samarali sa’y-harakatlarni davom ettirishiga ishonch bildirdi”.
Emomali Rahmon BMT bosh kotibini Shanxay hamkorlik tashkiloti Davlat rahbarlari kengashining sentabr oyida Dushanbeda bo‘lib o‘tadigan yubiley yig‘ilishida ishtirok etishga taklif qildi.
Eslatib o‘tamiz, “Tolibon” 8-iyul kuni Tojikiston bilan chegaradosh Panj daryosidagi ko‘prikda o‘z bayrog‘ini o‘rnatdi. Rossiya esa Afg‘onistondagi vaziyat tufayli Tojikistondagi harbiy bazasidan foydalanishga tayyorligini bildirdi.
5-iyul kuni Tojikiston prezidenti Emomali Rahmon tojik-afg‘on chegarasini mustahkamlash uchun armiya rezervidagi 20 ming nafar harbiy xizmatchini safarbar etgandi. 8-iyulda esa Tojikiston Afg‘oniston bilan chegaraga qo‘shimcha qo‘shinlarni yuborishi, chegarani yanada mustahkamlash uchun zaxiradagi yana 20 ming harbiyni safarbar qilishi haqida xabar berilgan.
Tojikistonga ikki hafta ichida 1500 nafar afg‘onistonlik harbiylar qochib o‘tgani ma’lum qilindi. Afg‘oniston harbiylari “Tolibon” vakillari bilan harbiy to‘qnashuvlardan keyin Tojikiston chegarasini turli nuqtalarda kesib o‘tgan.
Avvalroq Tojikiston Afg‘onistondagi siyosiy vaziyatga qaramay, mamlakatga elektr energiyasi yetkazib berishda davom etayotgani haqida xabar berilgandi.
Izoh (0)