Тожикистон президенти Эмомали Раҳмон 13 июль куни БМТ Бош котиби Антониу Гутерриш билан телефон орқали суҳбат чоғида Афғонистондаги вазиятнинг кескинлашувини муҳокама қилди. Бу ҳақда Тожикистон раҳбаринининг матбуот хизматига таяниб, «ТАСС» хабар берди.
«Афғонистонаро музокаралар жараёнини амалий бошлашда ҳар томонлама ёрдамнинг муҳим экани қайд этилди. Шу муносабат билан ушбу масалада манфаатдор томонлар ўртасида яқин мувофиқликни давом эттириш зарурлиги таъкидланди», — дейилади хабарда.
Тожикистон президенти, шунингдек, «БМТ 2030 йилгача бўлган давр учун кун тартибини, унинг барқарор ривожланиш мақсадлари ва БМТ Бош ассамблеясининг бошқа резолюсияларини изчил амалга ошириш, уларга муносиб ва муваффақиятли жавоб бериш учун самарали саъй-ҳаракатларни давом эттиришига ишонч билдирди».
Эмомали Раҳмон БМТ бош котибини Шанхай ҳамкорлик ташкилоти Давлат раҳбарлари кенгашининг сентябрь ойида Душанбеда бўлиб ўтадиган юбилей йиғилишида иштирок этишга таклиф қилди.
Эслатиб ўтамиз, «Толибон» 8 июль куни Тожикистон билан чегарадош Панж дарёсидаги кўприкда ўз байроғини ўрнатди. Россия эса Афғонистондаги вазият туфайли Тожикистондаги ҳарбий базасидан фойдаланишга тайёрлигини билдирди.
5 июль куни Тожикистон президенти Эмомали Раҳмон тожик-афғон чегарасини мустаҳкамлаш учун армия резервидаги 20 минг нафар ҳарбий хизматчини сафарбар этганди. 8 июлда эса Тожикистон Афғонистон билан чегарага қўшимча қўшинларни юбориши, чегарани янада мустаҳкамлаш учун захирадаги яна 20 минг ҳарбийни сафарбар қилиши ҳақида хабар берилган.
Тожикистонга икки ҳафта ичида 1500 нафар афғонистонлик ҳарбийлар қочиб ўтгани маълум қилинди. Афғонистон ҳарбийлари «Толибон» вакиллари билан ҳарбий тўқнашувлардан кейин Тожикистон чегарасини турли нуқталарда кесиб ўтган.
Аввалроқ Тожикистон Афғонистондаги сиёсий вазиятга қарамай, мамлакатга электр энергияси етказиб беришда давом этаётгани ҳақида хабар берилганди.
Изоҳ (0)